Long Weekend: देवा तुझ्या दारी आलो... नाताळ, नववर्ष सेलिब्रेशनसह विकेंडला धार्मिक पर्यटन हाउसफुल्ल

नाताळ आणि नववर्ष अशा सलग येणार्‍या सुट्ट्यांमुळे महाराष्ट्रातील मंदिरांमध्ये भाविकांची गर्दी उसळली आहे. कोल्हापुरची अंबाबाई, जेजुरी गडावरील खंडेराया, अक्कलकोट श्री स्वामी समर्थ आणि शेगाव येथील संत गजानन महाराज समाधीला भेट देण्यासाठी देशभरातून भाविकांनी मोठी गर्दी केलीय. आणि ही गर्दी वाढत जाणार असल्याचं सांगण्यात येत आहे. नाताळ आणि नववर्ष अशा सुट्ट्या आणि लाँग विकेंडमध्ये धार्मिक स्थळांवर गर्दी वाढण्याची शक्यता आहे.

नाताळ आणि नववर्षात सलग सुट्ट्या असल्यानं कोल्हापुरात राज्यभरातील पर्यटक आणि भाविकांनी मोठी गर्दी केली आहे. शनिवार आणि रविवारी अंबाबाई मंदिर परिसर भाविकांनी फुलून गेला होता. पहाटेपासून पर्यटक आणि भाविकांनी मोठ्या प्रमाणावर अंबाबाई देवीच्या दर्शनासाठी गर्दी केली होती. तसेच कोल्हापूर जिल्ह्यातील पन्हाळा, जोतिबा देवस्थान, नवीन राजवाडा या ठिकाणीही पर्यटक गर्दी करताना दिसत आहेत.

लाँग विकेंड असल्याकारणानं जेजुरीच्या खंडेरायाच्या दर्शनासाठी जेजुरी गडावर भाविकांची गर्दी उसळली होती. शनिवार रविवार सलग सुट्ट्या असल्यानं भाविकांच्या सकाळपासूनच जेजुरी गडावर दर्शनासाठी रांगा लागल्या होत्या. नाताळ, नववर्षानिमित्त देखील जेजुरी गडावर भाविकांची गर्दी वाढण्याची शक्यता आहे.

सलग सुट्ट्या आल्यामुळे अक्कलकोट श्री स्वामी समर्थांच्या दर्शनासाठी भक्तांची मोठी गर्दी पाहायला मिळाली. शनिवारी आणि रविवारनिमित्त श्री स्वामी समर्थांच्या दर्शनासाठी सिंह चौकापर्यंत दर्शनासाठी रांग लागली होती. नाताळ आणि नववर्षानिमित्त दर्शनासाठी भाविकांच्या संख्येत मोठी वाढ होण्याची शक्यता आहे. तसेच दर्शनासाठी येणाऱ्या भाविकांची संख्या वाढल्यानं देवस्थानचे अन्नछत्राचे भक्तनिवास देखील फुल्ल झाले आहे.

नाताळ आणि सलगच्या सुट्ट्या आणि वर्षाचा शेवट असल्यानं, शेगाव येथील संत गजानन महाराज समाधीचे दर्शन घेण्यासाठी देशभरातून भाविकांनी मोठी गर्दी केली आहे. भाविकांमुळे शेगाव शहरातील सर्व हॉटेल्स, लॉज हाऊसफुल्ल झाले असून, दिवसेंदिवस शेगावात भाविकांची मोठी गर्दी वाढत आहे. आनंद सागर परिसरातही भाविक भेट देत असल्यानं आनंद सागर परिसरातही मोठी गर्दी बघायला मिळत आहे.