Cyberattack On Airports: विमानतळांवर सायबर हल्ला; चेक-इन आणि बोर्डिंग सेवा ठप्प;UK-बेल्जियमसह युरोपच्या फ्लाइट रद्द

युरोपातील अनेक प्रमुख विमानतळांवर सायबर हल्ले झाले. लंडनमधील हीथ्रो, बेल्जियममधील ब्रुसेल्स आणि जर्मनीतील बर्लिनसह अनेक विमानतळावर हा हल्ला झाला. हा सायबर हल्ला चेक-इन आणि बोर्डिंग सिस्टीमशी संबंधित सेवा प्रदान करणारी कंपनी कॉलिन्स एअरस्पेसवर झाला. या हल्ल्यामुळे चेक-इन आणि बोर्डिंगवर परिणाम झाला.

या सायबर हल्ल्यामुळे अनेक उड्डाणे रद्द झाली आहेत, तर अनेक उड्डाणे उशिरा सुरू झालीत. या हल्ल्यामुळे हजारो प्रवाशांना गैरसोयीचा सामना करावा लागत आहे. युरोपमधील अनेक विमानतळांनी प्रवाशांना त्यांच्या विमानाची स्थिती तपासण्याचा सल्ला दिलाय. ब्रुसेल्स विमानतळाने एका निवेदनात म्हटलं की, हल्ल्यामुळे फक्त मॅन्युअल चेक-इन आणि बोर्डिंग करता येत होतं.

प्रवासी हाताळणी प्रणालीसाठी सेवा प्रदात्यावरही हल्ला करण्यात आला, ज्यामुळे विमानतळ चालकांना ही प्रणाली डिस्कनेक्ट करावी लागल्याचं, बर्लिनच्या ब्रँडनबर्ग विमानतळावरील अधिकाऱ्यांनी सांगितले. सायबर हल्ल्याचा परिणाम फक्त काही विमानतळांवरच जाणवला. पॅरिसच्या रॉईसी, ऑर्ली आणि ले बोर्जेट विमानतळांवर कोणतीही समस्या आली नाही, असं फ्रान्सने सांगितलं.

कुठे-कुठे हल्ला झाला?

कोलिन्स एरोस्पेस, एक अमेरिकन विमान वाहतूक आणि संरक्षण तंत्रज्ञान कंपनीवर सायबर हल्ला झाला. ही कंपनी आरटीएक्स कॉर्पची उपकंपनी आहे. या कंपनीला आधी रेथिऑन टेक्नॉलॉजीज म्हटलं जात होतं. कंपनीने म्हटलं की, ते प्रवाशांना थेट चेक-इनची सुविधा देत नाही, परंतु असे तंत्रज्ञान विकसित करते जे प्रवाशांना किओस्क मशीनवर स्वतः चेक-इन करण्याची, बोर्डिंग पास आणि बॅग टॅग प्रिंट करण्याची आणि स्वतःचे सामान स्वतः पाठवून शकतात.

पुढे बोलताना कंपनीने सांगितलं की, "आम्हाला निवडक विमानतळांवर आमच्या MUSE सॉफ्टवेअरमध्ये सायबर समस्येची जाणीव झालीय. याचा परिणाम फक्त इलेक्ट्रॉनिक चेक-इन आणि बॅगेज कलेक्शनवर झालाय.