मध्यरात्री ठो-ठो, गोळीबाराचा आवाज ऐकून नागरीक घाबरले, बिल्डरच्या ऑफिसवर ३० गोळ्या झाडल्या अन्...

हरियाणाच्या गुरूग्राम सेक्टर - ४५मधून एक धक्कादायक बातमी समोर येत आहे. एमएनआर बिल्डमार्क एलएलपी (बिल्डर)च्या ऑफिसबाहेर गुरूवारी गोळीबाराचा प्रकार घडला. रात्रीच्या सुमारास आरोपींनी २५ ते ३० गोळ्या झाडल्या. गोळ्या ऑफिसच्या खिडक्यांना आणि लक्झरी वाहनांना लागल्या. सुदैवाने घटनास्थळी कुणीही उपस्थित नव्हते. दरम्यान, गँगस्टर दीपक नंदलने या गुन्ह्याची जबाबदारी स्वीकारली आहे.

एमएनआर बिल्डमार्क कंपनी मोठ्या प्रमाणात फ्लॅट्स आणि शेतीच्या जमिनी खरेदी विक्रीचे व्यवहार करते. गुरूवारी सायंकाळी उशिरा कंपनीचे सर्व कर्मचारी घरी गेले होते. रात्रीच्या सुमारास ४ आरोपी मास्क घालून २ दुचाकीवरून आले होते. त्यांनी कंपनीच्या बाहेरील लोखंडी गेटवरून उडी मारली. तसेच आत प्रवेश केला. त्यानंतर अंदाधुंद गोळी झाडण्याल सुरूवात केली.

गोळ्या मुख्य गेटच्या काचेवर तसेच गाड्यांना लागल्या. घटनेवेळी तीन केअरटेकर उपस्थित होते. या प्रकरणानंतर केअरटेकर राजेश यांनी पोलीस ठाण्यात तक्रार दाखल केली. तक्रारीवरून पोलिसांनी गुन्हा दाखल केला. तसेच स्थानिकांनी देखील माहिती दिली. अचानक गोळीबाराचा आवाज आल्यानं परिसरातील लोक बाहेर आले, असं त्यांनी सांगितलं.

परिसरातील तरूणांनी आरोपींना गोळ्या झाडताना पाहिलं. पोलिसांनी घटनास्थळी पोहोचून तपास सुरू केला. त्यांनी सीसीटीव्ही फुटेजही जप्त केलेआहे. त्यानंतर गुन्हे शाखेचे अधिकारी आणि फॉरेन्सिक टीम घटनास्थळी दाखल झाले. त्यांनी तपासाला सुरूवात केली आहे. दरम्यान, पोलिसांनी बिल्डरच्या कुटुंबाला पोलीस संरक्षण दिले आहे.