अभिजीत दिपकेंच्या भेटीवरून महायुतीत वाद; भाजपकडून संजय शिरसाठ-कडूंवर कारवाईची मागणी

कॉक्रोच जनता पार्टी विरुद्ध भारतीय जनता पार्टी यांच्यातील राजकीय वादाची झळ आता महायुतीतल्या मित्रपक्षांनाही बसू लागलीय. शिक्षणमंत्र्यांचा राजीनामा घेऊन संभाजीनगरमध्ये परतलेल्या अभिजित दिपकेंच्या घरी सध्या नेत्यांची वर्दळ पाहायला मिळतेय. विशेष म्हणजे, गल्लीपासून दिल्लीपर्यंत एकत्र असलेल्या शिंदे गटाचे बडे नेतेच आता दिपकेंच्या भेटीला धावत असल्यानं चर्चा तर होणारच.

आधी सामाजिक न्यायमंत्री संजय शिरसाट आणि पाठोपाठ आमदार बच्चू कडूंनी दिपकेंची आणि त्यांच्या कुटुंबियांची भेट घेतली. त्यामुळे अस्वस्थ झालेल्या भाजपनं या भेटीबाबत तीव्र नाराजी व्यक्त केलीय. इतकंच नाही, भाजपच्या वरिष्ठ नेते आणि महसूल मंत्री चंद्रशेखऱ बावनकुळेंनी य़ा दोघांवर थेट कारवाईचीच मागणी केलीय.

भाजपच्या या आक्रमक भूमिकेनंतर आता एकनाथ शिंदे काय पाऊल उचलतात, याकडे सर्वांचं लक्ष लागलेलं असतांना शिंदेंनी या राजकीय नाट्यानंतर मंत्री संजय शिरसाट यांना समज दिल्याची माहिती सूत्रांनी दिलीय. मात्र यावरून अभिजीत दिपकेंनी पुन्हा एकदा भाजपवर निशाणा साधलाय.

शत्रूचा शत्रू तो आपला मित्र हा राजकारणातला अलिखित नियम मानला जातो. पण मित्रपक्ष म्हणून भाजपासोबत सत्तेत असलेल्या शिंदे गटाच्या मंत्र्यांनी आणि आमदारांनीच भाजपच्या कट्टर विरोधकाचे उंबरे झिजवल्याने युतीत मिठाचा खडा पडलाय. याच भेटीसत्रानं शिंदेसेनेनं राज्य भाजपच्या शिरस्त नेतृत्वाला न जुमानता थेट केंद्रीय नेतृत्वाला आपली राजकीय ताकद दाखवून देतायत की या केवळ अनौपचारिक भेटी आहेत? कारण राजकारणात कोणतीच भेट, कोणतीही बैठक विनाकारण होत नसते. त्यामुळे यावरून पुढे काय काय होतं ते पाहणं महत्त्वाचं आहे.