Crime News: तब्बल 400 कोटी रुपये असलेले दोन कंटेनर चोरीला; कर्नाटकातील चोरीचं नाशिक कनेक्शन काय?

महापालिका निवडणुकांचा धुरळा असताना नाशिकमधून एक खळबळजनक प्रकरण समोर आलंय. निवडणुकीच्या धामधुमीत तब्बल ४०० कोटी रुपये असलेले कंटेनर चोरीला गेलेत. या प्रकरणात राजकीय आणि बिल्डर लॉबीचा समावेश असल्याचा आरोप करण्यात आलाय. या प्रकरणात आत्तापर्यंत ७ संशयित पोलिसांच्या ताब्यात आहेत. ४०० कोटींच्या जुन्या नोटांचा कंटेनर कर्नाटक हद्दीत चोरीला गेलाय. दरम्यान पोलिसांनी ताब्यात घेतलेल्या संशयितांकडे कर्नाटक पोलिसांनी देखील चौकशी केली आहे. तर कंटेनर चोरी प्रकरणात नाशिक ग्रामीण पोलिसांनी रात्री उशिरा डोंबिवलीमधून एका संशयिताला ताब्यात घेतलंय.

विशेष म्हणजे नाशिकमधील एका तरुणाच्या अपहरणाच्या तपासातून हा संपूर्ण प्रकार समोर आलाय. पोलिसांनी दिलेल्या माहितीनुसार, नाशिकमध्ये संदीप पाटील या तरुणाचं अपहरण झालं होतं. या प्रकरणी तपासा करताना कर्नाटकमधील चोरला घाटात १६ ऑक्टोबर रोजी कंटेनर लुटण्यात आले होते असा खुलासा संदीप पाटील याने केलाय. गोव्याहून कर्नाटकमार्गे एका ट्रस्टकडे जाणाऱ्या दोन कंटेनरमध्ये तब्बल ४०० कोटी रुपये होते. हे पैसे २००० रुपयांच्या जुन्या नोटांमध्ये होते. नाशिकमध्ये अपहरणाची तक्रार दाखल केल्यानंतर ४०० कोटींच्या जुन्या नोटांचा कंटेनर चोरीला गेल्याच उघडकीस आलंय.

संदीप पाटील याने सोशल मीडियावर एक व्हिडीओ शेअर करत कंटेनर चोरीची माहिती दिलीय. “१६ ऑक्टोबर २०२५ रोजी कर्नाटकमधील चोरला घाटात दोन कंटेनरमध्ये ४०० कोटी रुपये होते. हे पैसे गोव्याहून कर्नाटकमार्गे एका ट्रस्टकडे जात होते. रात्रीच्या अंधारात हे कंटेनर लुटण्यात आलेत. या कंटेनरमधील २००० रुपयांच्या जुन्या नोटांचा मूळ मालक हा ठाण्यातील एक बिल्डर असल्याचं संदीप पाटीलने सांगितलंय.