Summary -

• नगरपरिषद निकालाच्या दिवशी पालघरमध्ये मोठा राजकीय भूकंप

• बहुजन विकास आघाडीच्या दिग्गज नेत्यांचा शिवसेनेत प्रवेश

• दिग्गज नेत्याने ४०० कार्यकर्त्यांसह धनुष्यबाण हाती घेतलं

• एकनाथ शिंदेंच्या उपस्थितीत पक्षप्रवेश सोहळा पार पडला

नगरपरिषद- नगरपंचायत निवडणूक निकालाच्या दिवशीच पालघरमध्ये मोठी राजकीय घडामोड घडली आहे. निवडणूक निकालाच्या दिवशी उपमुख्यमंत्री एकनाथ शिंदे यांनी धमाका केला. एकनाथ शिंदे यांनी बहुजन विकास आघाडीचे अध्यक्ष हितेंद्र ठाकूर यांच्या गडाला सुरूंग लावला. हितेंद्र ठाकूर यांच्या पक्षातील अनेक दिग्गज नेत्यांनी पक्षाची साथ सोडली. त्यांनी शिवसेनेमध्ये प्रवेश करत धनुष्यबाण हाती घेतले. त्यामुळे पालघरमध्ये शिवसेनेची ताकद चांगलीच वाढली आहे.

मिळालेल्या माहितीनुसार, उपमुख्यमंत्री एकनाथ शिंदे यांच्या शिवसेनेने हितेंद्र ठाकूरांच्या बहुजन विकास आघाडीला मोठा धक्का दिला. बहुजन विकास आघाडीचे अध्यक्ष हितेंद्र ठाकुर यांच्या पक्षाचे माजी नगरसेवक विमल पाटील आणि केशव पाटील यांनी पक्षाची साथ सोडून धनुष्यबाण हाती घेतले.

शिवसेनेचे पालघर जिल्हाध्यक्ष निलेश तेंडोलकर यांच्या मार्गदर्शनाखाली चारशे कार्यकर्त्यांसह त्यांनी शिवसेनेत प्रवेश केला. एकनाथ शिंदे यांच्या उपस्थिती हा पक्षप्रवेश सोहळा पार पडला. निवडणुकीच्या तोंडावर बहुजन विकास आघाडीला माजी नगरसेवक सोडून जात असल्यामुळे ठाकूरांची डोकेदुखी चांगलीच वाढली आहे.

तर दुसरीकडे नवी मुंबईत एकनाथ शिंदे राजकीय धमाका करणार आहेत. नवी मुंबई महानगरपालिकेच्या निवडणुकीच्या निमित्ताने शिवसेनेने नवी मुंबई शहरामध्ये राजकीय कंबर कसली आहे. त्यामुळे नवी मुंबई महानगरपालिकेमध्ये शिवसेनेची सत्ता यावी या दृष्टीने उपमुख्यमंत्री एकनाथ शिंदे मैदानात उतरलेले आहेत. पक्षप्रवेशांचा धडाका सुरू आहे.

आज एकनाथ शिंदे यांच्या नेतृत्वाखाली नवी मुंबई शहरामध्ये शिवसेना पदाधिकाऱ्याचा मेळावा आयोजित करण्यात येत आहे. याच मेळाव्यामध्ये विविध पक्षातील अनेक दिग्गज नेते, माजी नगरसेवक शिंदेंच्या शिवसेनेत पक्ष प्रवेश करणार आहेत. त्यामुळे नवी मुंबई शहरांमध्ये शिवसेनेची राजकीय ताकद वाढताना दिसून येत आहे. या पक्षप्रवेश सोहळ्याला दिग्गज नेते उपस्थित राहणार आहेत