बॉलिवूड चित्रपटापासून राजकारणापर्यंत आपल्या कर्तृत्वाच्या जोरावर वेगळे स्थान मिळविणाऱ्या राज बब्बर यांचा आज वाढदिवस. २३ जून १९५२ रोजी उत्तर प्रदेशातील तुंडला येथे जन्मलेल्या राज बब्बर यांचा आज ७२ वा वाढदिवस आहे. त्यांनी आपल्या दमदार अभिनयाच्या जोरावर राज यांनी ८० च्या दशकात सिनेविश्वावर राज्य केले आहे. पथनाट्य आणि रंगभूमीपासून राज यांनी आपल्या फिल्मी करियरची सुरुवात केली. अभिनयात माहीर असलेले राज बब्बर काही काळाने राजकारणातही सक्रिय झाले.

देशातल्या राजकारणामध्ये राज बब्बर हे नाव कमालीचं चर्चेतलं आहे. त्यांनी १९८९ मध्ये जनता दल पक्षातून राजकारणात एन्ट्री मारली. १९९४ ते १९९९ या काळात राज बब्बर राज्यसभेचे खासदार म्हणून राहिले होते. अलीकडेच त्यांनी गुरुग्राम लोकसभा मतदारसंघातून काँग्रेसच्या तिकिटावर निवडणूक लढवली, ज्यात त्यांचा पराभव झाला होता.

२०१४ मध्येही राज यांनी गाझियाबादमधून निवडणूक लढवली होती. तेव्हाही त्यांचा पराभव झाला होता. राज बब्बर हे यूपी काँग्रेसचे अध्यक्षही राहिले आहेत. २००९ मध्ये फिरोजाबाद मतदारसंघातून सपाच्या तिकिटावर ते लोकसभा निवडणूक जिंकले.

२००९ मध्ये त्यांनी फिरोजाबाद जागेवर झालेल्या निवडणुकीत डिंपल यादव यांचा पराभव केला होता. मात्र, दोन वर्षांनंतर त्यांची सपा पक्षातून हकालपट्टी करण्यात आलेली होती. त्यानंतर त्यांनी काँग्रेसमध्ये प्रवेश केला.

१९७७ मध्ये रिलीज झालेल्या 'किस्सा कुर्सी का' चित्रपटातून राज बब्बर यांनी आपल्या अभिनय कारकिर्दीला सुरुवात केली. एनएसडीमधून शिक्षण घेतलेल्या राज यांचे 'इन्साफ का तराजू'मध्ये आपल्या दमदार अभिनयाने सर्वांची मनं जिंकली. 'निकाह' चित्रपटातील सलमा आगा आणि 'आज की आवाज'मधील त्यांच्या आणि स्मिता पाटील यांच्या लव्ह केमिस्ट्रीची तुफान चर्चा झाली. राज बब्बर यांनी पहिले लग्न १९७५ मध्ये नादिरासोबत तर दुसरे लग्न १९८३ मध्ये स्मिता पाटील यांच्यासोबत केले होते. १९८२ मध्ये प्रदर्शित झालेल्या 'भीगी पालकी' चित्रपटाच्या शुटिंगवेळी राज बब्बर यांची स्मिता पाटील यांच्याशी भेट झाली. समाजाची पर्वा न करता त्यांनी स्मिता पाटील यांच्यासोबत दुसरे लग्न केले.

राज बब्बर आणि स्मिता पाटील यांना आर्य बब्बर, जुही बब्बर आणि प्रतीक बब्बर अशी तीन मुले आहेत. १९८६ मध्ये मुलाला जन्म दिल्यानंतर अवघ्या १५ दिवसांनी स्मिता पाटील यांचे निधन झाले. त्यांच्या मृत्यूमुळे राज बब्बर फारच खचले आणि परत ते पहिली पत्नी नादिराकडे गेले. राज यांनी आपल्या सिनेकरियरमध्ये अनेक चित्रपटांमध्ये मुख्य भूमिका साकारली. त्यातील त्यांचे अनेक चित्रपट बॉक्स ऑफिसवर हिट ठरले.