Marathi Morcha : मनसे नेते अविनाश जाधवांना पोलिसांनी सोडलं, पहाटेच घरातून घेतलं होतं ताब्यात

Avinash Jadhav News : मनसे नेते अविनाश जाधव यांना पोलिसांनी अखेर सोडले आहे. मंगळवारी पहाटे त्यांना पोलिसांनी घरातून ताब्यात घेतले होते. मीरा रोड, मीरा भाईंदर येथील मोर्चाच्या पार्श्वभूमीवर जाधव यांना ताब्यात घेण्यात आले होते. मीरा रोडमध्ये आज मोर्चा निघणार होता, त्याला पोलिसांनी परवानगी नाकारली होती. पण अविनाश जाधव मोर्चावर ठाम होते. त्यामुळे त्यांना पोलिसांनी ताब्यात घेतले होते. लोकांचा रोष आणि राग संताप पाहिल्यानंतर त्यांना आज सोडण्यात आले.

अविनाश जाधव काय म्हणाले?

मला ताब्यात घेण्यापेक्षा आजचा मोर्चा निघणं हे महत्त्वाचं होतं. ते मराठी माणसांनी करुन दाखवलंय. मी मीरा रोडच्या लोकांचं आभार मानतो. मराठीचा माज काय हे दाखवून दिलं आहे, असे जाधव म्हणाले. मला अटक केली नसती तर मोर्चा प्रचंड मोठा झाला असता. मराठी लोकांच्या विरोधात मोर्चा निघत असेल तर मोठा मोर्चा झालाच पाहिजे, असेही ते म्हणाले. प्रताप सरनाईक यांच्यावर बाटली फेकली हे काही योग्य नाही. आम्ही याचं समर्थन करत नाही, असं जाधव यांनी सांगितले.