Maharashtra Budget 2024: आशियाई क्रीडा स्पर्धेतील पदक विजेत्या खेळाडूंवर बक्षिसांचा वर्षाव! अर्थसंकल्पात अजित पवारांची घोषणा

Maharashtra Budget 2024 For Sports Players:

राज्याचे अर्थमंत्री अजित पवार यांनी आज (२७ फेब्रुवारी) राज्याचा अंतरिम अर्थसंकल्प सादर केला. हा राज्याचा अंतरिम अर्थसंकल्प असून आगामी लोकसभा निवडणुकीनंतर अतिरिक्त अर्थसंकल्प सादर केला जाणार आहे. या अर्थसंकल्पात आशियाई क्रीडा स्पर्धेत जेतेपद पटकावणाऱ्या खेळाडूंसाठी बक्षिसांची घोषणा करण्यात आली आहे.

खेळाडूंसाठी बक्षिसांची घोषणा....

हांगझोऊ येथे झालेल्या आशियाई क्रीडा स्पर्धेत भारतीय खेळाडूंनी दमदार खेळ करत १०७ पदकं पटकावली होती. या स्पर्धेत एकूण ६५५ खेळाडूंनी सहभाग घेतला होता. ज्यात ७३ भारतीय खेळाडूंचा समावेश होता. या ७३ खेळाडूंनी भारताला ३२ पदकं जिंकून दिली. या पदकविजेत्या खेळाडूंवर बक्षिसांचा वर्षाव केला जाणार आहे. (Sports news marathi)

आशियाई क्रीडा स्पर्धेत सुवर्णपदकावर नाव कोरणाऱ्या खेळाडूंना १ कोटी रुपये बक्षिस म्हणून दिले जाणार आहेत. तर रजत पदक पटकावणाऱ्या खेळाडूंना ७५ लाख रुपये दिले जाणार असून कांस्यपदक पटकावणाऱ्या खेळाडूंना ५० लाख रुपये दिले जाणार असल्याची घोषणा अर्थमंत्री अजित पवार यांनी केली आहे.