क्रिकेटर अभिषेक पोरेलला अटक; लग्नाचे आमिष दाखवून लैंगिक अत्याचार केल्याचा आरोप

आयपीएलमध्ये दिल्ली कॅपिटल्सचा यष्टीरक्षक-फलंदाज अभिषेक पोरेलला अटक करण्यात आली आहे. लग्नाचे आश्वासन देऊन लैंगिक संबंध ठेवल्याच्या आरोपावरून हुगळी पोलिसांनी मंगळवारी सकाळी पोरेलला ताब्यात घेतले आहे. अनेक तास चौकशी केल्यानंतर पोलिसांनी त्याला अटक केली. या प्रकरणात एका वैद्यकीय विद्यार्थिनीने तक्रार दाखल केली. विद्यार्थिनीच्या तक्रारीच्या आधारे मोगरा पोलीस ठाण्यात गुन्हा नोंदवण्यात आला आहे.

अटक केल्यानंतर पोरेलची वैद्यकीय तपासणी करण्यात आलीय. त्यानंतर त्याला चिन्सुराह न्यायालयात हजर करण्यात आले. दरम्यान या प्रकरणी मंगळवारीच जामिनासंदर्भातील सुनावणीही होणार होती. पण त्याआधीच कोलकत्ता उच्च न्यायालयाने पोलिसांना पोरेलला अटक करण्याचे निर्देश दिले.

मिळालेल्या माहितीनुसार, हुगळीतील मोगरा पोलीस ठाण्यात एका मेडिकल कॉलेजच्या विद्यार्थिनीने पोरेलविरोधात तक्रार दाखल केली. पोरेलने तिच्याशी लग्न करण्याचे आश्वासन देऊन तिच्याशी लैंगिक संबंध ठेवले. दोघांमधील काही खासगी क्षणाचे काही व्हिडिओ रेकॉर्ड केले असल्याचा आरोप विद्यार्थिनीने केलाय.

तक्रारदार विद्यार्थिनीच्या म्हणण्यानुसार, दोन्ही कुटुंबांमध्ये लग्नाबाबत चर्चाही झाली होती. मात्र, त्यानंतर पोरेलचे इतर महिलांशी संबंध होते, अशी माहिती तिला मिळाल्याचा दावा तिने केलाय. त्याचे इतर महिलेशी संबंध असल्यानं तिने पोलिसांकडे तक्रार केली आहे. या प्रकरणातील आरोप सध्या तक्रार आणि FIRमध्ये नमूद केलेल्या दाव्यांवर आधारित आहेत. या आरोपांची सत्यता न्यायालयीन प्रक्रियेत तपासली जाणार आहे.

या प्रकरणाच्या FIRमध्ये एकूण 19 कलमांचा उल्लेख असल्याचे समोर आले आहे. FIRनुसार, कथित घटना 2 एप्रिल 2026 रोजी दिल्लीत घडल्याचा दावा विद्यार्थिनीने केला आहे. तक्रारीत पोरेलने तिला कथितरित्या एका ठिकाणी जाण्यापासून रोखले आणि तिला पुरेसे जेवणही दिले नसल्याचा आरोप करण्यात आला आहे. तसेच तिला जाणीवपूर्वक इतरांपासून दूर ठेवण्यात आल्याने तिची शारीरिक स्थिती बिघडली आणि चालण्यासही अडचण निर्माण झाल्याचा दावा तक्रारीत करण्यात आलाय.