CSK ला पराभूत करत SRH नं मिळवलं प्लेऑफचं तिकीट; गुजरात टायटन्सचीही चांदी

सनरायझर्स हैदराबादने (SRH) आयपीएल २०२६ च्या प्लेऑफमधील आपले स्थान निश्चित केले. त्यांनी चेपॉक स्टेडियमवर चेन्नई सुपर किंग्सला (CSK) पाच गडी राखून पराभूत केले. पॅट कमिन्सच्या नेतृत्वाखालील संघाने CSK ला हरवून आपले प्लेऑफमध्ये एंट्री घेतली. इतकेच नाही हैदराबादच्या विजयामुळे गुजरात टायटन्सलाही प्लेऑफचं तिकीट मिळवलं.

१३ सामन्यांपैकी आठ सामने जिंकून एसआरएच (SRH) आणि जीटी (GT) यांचे प्रत्येकी १६ गुण आहेत. चांगल्या नेट रन रेटमुळे जीटी गुणतालिकेत दुसऱ्या स्थानावर आहे. तर एसआरएच तिसऱ्या स्थानावर कायम आहे. गतविजेता रॉयल चॅलेंजर्स बंगळूर (RCB) १३ सामन्यांतून १८ गुणांसह अव्वल स्थानी आहे. तर प्लेऑफसाठी आधीच पात्र ठरला आहे. १३ सामन्यांतील सातव्या पराभवानंतर सीएसके एक स्थान खाली घसरला आहे. हैदराबाद आणि गुजरातच्या प्लेऑफमधील एंट्रीमुळे आयपीएलमध्ये 'एक अनार सौ बिमार' सारखी परिस्थिती निर्माण झाली आहे.

जागा एक अन् संघ पाच

प्लेऑफसाठी फक्त चार संघ पात्र ठरतात. परंतु चालू हंगामात प्लेऑफची फक्त एक जागा रिक्त आहे. सीएसकेसह पाच संघ या जागेसाठीच्या शर्यतीत आहेत. सीएसकेला आपला शेवटचा लीग सामना जिंकूनच १४ गुणांपर्यंत पोहोचता येणार आहे. सीएसकेच्या पराभवामुळे राजस्थान रॉयल्स पॉईट्स टेबलमध्ये पाचव्या स्थानावर आला आहे. राजस्थान वगळता इतर कोणत्याही संघाला १६ पाईंट्स घेता येणार नाही.

त्यामुळे उर्वरित संघांच्या आशा केवळ त्यांच्या स्वतःच्या विजयांवरच नव्हे, तर इतर संघांच्या पराभवांवरही अवलंबून असणार आहे. आतापर्यंत मुंबई इंडियन्स (एमआय) आणि लखनौ सुपर जायंट्स (एलएसजी) हे संघ प्लेऑफच्या शर्यतीतून अधिकृतपणे बाहेर पडलेत. दोघांनीही १२ सामन्यांमधून प्रत्येकी ८ गुण मिळवले आहेत. यष्टीरक्षक इशान किशनच्या अर्धशतकाच्या जोरावर सनरायझर्स हैदराबादने चेन्नई सुपर किंग्सवर विजय मिळवला. चेपॉकच्या संथ खेळपट्टीवर विजयासाठी १८१ धावांचे लक्ष्य सोपे नव्हते. इशानने आपल्या ४७ चेंडूंच्या खेळीत सात चौकार आणि तीन षटकारांसह ७० धावा केल्या. त्याला सामनावीर म्हणून गौरवण्यात आले