CSK vs KKR IPL 2025 : घरच्याच मैदानात शिकार झाली! संघाची धुरा सांभाळूनही धोनीचे शेर KKR समोर ढेर; पॉइंट टेबलमध्ये तळाशी

चेन्नई : महेंद्रसिंग धोनी कर्णधार म्हणून आला, पण आयपीएल २०२५च्या २५व्या सामन्यात चेन्नई सुपर किंग्जच्या फलंदाजीने कोलकाता नाईट रायडर्सच्या गोलंदाजांसमोर पूर्णपणे शरणागती पत्करली. ज्यामुळे आपल्याच घरच्या मैदानावर चेन्नईला लाजिरवाण्या पराभवाला सामोरं जावं लागलं आहे. चेन्नईला सलग पाचव्या पराभवाचा सामना करावा लागला आहे, ज्यामुळे संघ पॉइंट टेबलमध्ये तळाशी गेला आहे.

महेंद्रसिंग धोनीच्या नेतृत्वाखालील चेन्नई सुपर किंग्जने ६ पैकी फक्त १ सामना जिंकला आहे आणि पॉइंट टेबलमध्ये दहाव्या क्रमांकावर आहे. त्यांना आणखी ८ सामने खेळायचे आहेत. पण प्लेऑफमध्ये पोहोचण्यासाठी त्यांना किमान ७ सामने जिंकावे लागतील. जे आता अवघड दिसत आहे. त्यामुळे चेन्नई सुपर किंग्ज आयपीएलमधून जवळपास बाहेर पडण्याच्या मार्गावर असल्याचं बोललं जात आहे.

या सामन्यात केकेआरने नाणेफेक जिंकून प्रथम गोलंदाजी करण्याचा निर्णय घेतला. सुनील नरेनच्या नेतृत्वाखालील गोलंदाजांनी शानदार कामगिरी केली आणि सीएसकेला २० षटकांत नऊ गडी गमावून १०३ धावांवर रोखलं. सीएसकेकडून शिवम दुबेने सर्वाधिक धावा काढल्या, त्याने २९ चेंडूंच्या खेळीत ३ चौकार मारले आणि ३१ धावा केल्या. केकेआरकडून नरेनने सर्वाधिक तीन विकेट्स घेतल्या, तर वरुण चक्रवर्ती आणि हर्षित राणा यांनी प्रत्येकी दोन विकेट्स घेतल्या. दरम्यान, मोईन अली आणि वैभव अरोरा यांनी प्रत्येकी एक विकेट घेतली.