Nitish Kumar: मुख्यमंत्र्यांनी दिला आमदारकीचा राजीनामा! मोदी सरकारमध्ये मंत्रीपद मिळणार?

बिहारचे मुख्यमंत्री नितीश कुमार यांनी आज विधानपरिषदेचा राजीनामा दिला आहे. राज्यसभेवर खासदार म्हणून निवडून गेल्यावर घटनात्मकरित्या त्यांनी आज आमदारकीचा राजीनामा दिला आहे. विधानपरिषद सदस्य संजय गांधी यांच्यामार्फत विधान परिषद सदस्य सचिवालायाकडे पाठवला.

राजीनामा देण्याआधी मुख्यमंत्री निवासस्थानी बैठकींचे सत्र

मुख्यमंत्री नितीश कुमार यांच्या निवासस्थानी सकाळपासूनच लगबग सुरू होती. JDU चे ज्येष्ठ नेते लल्लन सिंग, संजय झा आणि विजय चौधरी सकाळपासूनच मुख्यमंत्र्यांच्या निवासस्थानी होते. प्रदीर्घ चर्चेनंतर नितीश कुमार यांनी आपला राजीनामा दिला.

विधान परिषदचे आमदार संजय गांधी मुख्यमंत्र्यांचा राजीनामा घेऊन स्वतः विधान परिषदेत गेले. त्यांनी नितीश कुमार यांचा राजीनामा अध्यक्ष अवधेश नारायण सिंह यांच्याकडे सुपूर्द केला. अध्यक्षांनी राजीनामा स्वीकारल्याने, बिहार विधान परिषदेतील नितीश कुमार यांचा २० वर्षांचा कार्यकाळ संपला. ते २००६ पासून या सभागृहाचे सदस्य होते.