Breaking News : पाकिस्तानचा भारतावर सायबर हल्ला, संरक्षण संकेतस्थळे हॅक

Pakistan cyber force attack : पहलगाममधील दहशतवादी हल्ल्यांनंतर भारताने कठोर पावले उचलत पाकिस्तानची कोंडी केली आहे. पण पाकिस्तानच्या कुरापती काही थांबायच्या नाव घेत नाहीत. पाकिस्तानकडून भारतावर सायबर हल्ला करण्याचा प्रयत्न करण्यात आलाय. पाकिस्तानमधून करण्यात आलेल्या सायबर हल्ल्यांमुळे संरक्षण कर्मचाऱ्यांची संवेदनशील माहिती धोक्यात आली आहे. त्यामध्ये संरक्षण कर्मचाऱ्यांचे लॉगिन क्रेडेन्शियल्सचा समावेश आहे.

पहलगाम दहशतवादी हल्ल्यानंतर भारत-पाकिस्तान संबंधांमध्ये तणाव वाढलाय. त्यातच पाकिस्तानी हॅकर्सनी भारताच्या संरक्षण संकेतस्थळांना लक्ष्य केलेय. ‘पाकिस्तान सायबर फोर्स’ या नावाने ओळखल्या जाणाऱ्या एका हॅकिंग ग्रुपने भारतावर सायबर हल्ला केलाय. पाकिस्तानी ग्रुपने भारताच्या संरक्षण विभागाची वेबसाइट हॅक केल्याचा दावा केलाय. त्यांनी असा दावा केलाय की, मिलिटरी इंजिनीअर सर्व्हिसेस आणि मनोहर पर्रीकर इन्स्टिट्यूट ऑफ डिफेन्स स्टडीज अँड ॲनालिसिसच्या संवेदनशील डेटा मिळवलाय.

या हल्ल्यानंतर भारताने सावध भूमिका घेतली आहे. आर्मर्ड व्हेईकल निगम लिमिटेडचे संकेतस्थळ तपासणीसाठी ऑफलाइन करण्यात आले आहे. पाकिस्तानकडून करण्यात आलेल्या सायबर हल्ल्यामुळे झालेल्या संभाव्य नुकसानाचा अंदाज घेण्यासाठी आणि उपाय शोधण्यासाठी हा निर्णय घेण्यात आलाय. मिळालेल्या माहितीनुसार, भारतीय सायबर सुरक्षा एक्सपोर्ट सध्या सायबरस्पेसवर नजर ठेवून आहेत. पाकिस्तानशी संबंधित धोकादायक गटांकडून होणाऱ्या सायबर हल्ल्यांचा शोध घेत आहेत.