Maharashtra Politics : एकनाथ शिंदेंचा राज ठाकरेंना मोठा धक्का; पुण्यातील शिलेदाराने समर्थकांसह धनुष्यबाण हाती घेतलं

सचिन जाधव, साम टीव्ही

उपमुख्यमंत्री एकनाथ शिंदे यांनी राज ठाकरेंना मोठा धक्का दिला आहे. पुण्यात मनसेला मोठा झटका बसला आहे. पुण्याचे मनसेचे शहर उपाध्यक्ष संदीप मोहिते पाटील यांनी केला शिवसेना शिंदे गटात प्रवेश केला आहे. त्यामुळे पुण्यासह राज्यात शिंदे गटात जोरदार इन्कमिंग सुरु आहे.

गेल्या काही दिवसांपासून एकनाथ शिंदे यांच्या नेतृत्वात शिंदे गटात जोरदार इनकमिंग पाहायला मिळत आहे. आता पुणे शहरातील मनसेला मोठा धक्का बसला आहे. पुणे शहर मनसेचे उपाध्यक्ष, युवा उद्योजक आणि सुप्रसिद्ध चित्रपट निर्माते संदीप मोहिते पाटील यांनी समर्थकांसह मंगळवारी शिंदे गटात प्रवेश केला. संदीप मोहिते पाटील यांच्या पक्ष प्रवेश मनसेला मोठा झटका मानला जात आहे.

हेमंत बत्ते, हिंदू युवा प्रबोधनीचे अध्यक्ष राजाभाऊ बेंद्रे, नितीन पायगुडे, प्रतीक सदाशिवराव मोहिते पाटील, रणजित ढगे पाटील, अभीषेक जगताप, विशाल पवार यांच्यासह संदीप मोहिते पाटील यांनी एकनाथ शिंदे यांच्या उपस्थितीत शिवसेनेत प्रवेश केला आहे. हाती भगवा झेंडा घेत भगवा आम्हाला प्राणप्रिय आहे, असा ठाम संदेश दिलाय.

एकेकाळी मनसेच्या माध्यमातून संपूर्ण पुण्यात ठसा उमटवणारे आणि संघटनात्मक बांधणीत पारंगत असलेले संदीप मोहिते पाटील यांनी एकनाथ शिंदे यांच्या शिवसेनेत प्रवेश करून राज ठाकरेंना धक्का दिला आहे. आगामी पुणे महानगरपालिका निवडणुकीच्या पार्श्वभूमीवर शिंदे गटासाठी हा पक्षप्रवेश अत्यंत महत्वपूर्ण मानला जात आहे. या नव्या नेतृत्वामुळे पुण्यातील शिवसेनेला नवचैतन्य प्राप्त होणार असल्याची भावना स्थानिक कार्यकर्त्यांनी व्यक्त केली आहे.

दरम्यान, काही दिवसांपूर्वी माजी आमदार रवींद्र धंगेकर यांच्यासह काही पदाधिकाऱ्यांनी शिंदे गटात प्रवेश केला होता. त्यानंतर आता संदीप मोहिते पाटील यांनी मनसेमधून एकनाथ शिंदे यांच्या शिवसेनेत प्रवेश केला आहे.