Video Viral : '...नाहीतर निघा बाहेर!' मुंबई लोकलमध्ये मराठी विरुद्ध हिंदी वाद टोकाला, ट्रेनच्या डब्यात महिलांमध्ये जुंपली

Marathi Vs Hindi Clash : मराठी विरुद्ध हिंदी हा वाद आता लोकल ट्रेनच्या महिला कोचपर्यंत पोहोचला आहे. सोशल मीडियावर एक व्हिडीओ व्हायरल होत आहे. या व्हिडीओमध्ये मध्य रेल्वेच्या लोकल ट्रेनच्या महिला कोचमध्ये महिलांमध्ये मराठी विरुद्ध हिंदी यावरुन जोरदार वाद झाल्याचे पाहायला मिळाले आहे. महिलांच्या भांडणाची सुरुवात कोचमधील सीटवरुन झाली. पण नंतर त्याचे रुपांतर भाषेच्या वादात झाले.

मुंबईत राहायचं असेल, तर मराठीत बोलायचं!

लोकल ट्रेनमधील व्हायरल व्हिडीओमध्ये महिलांमध्ये जुंपल्याचे पाहायला मिळते. व्हिडीओच्या सुरुवातीलाच एक महिला 'महाराष्ट्रात, मुंबईत राहताय ना तुम्ही,.. मुंबईत राहायचं असेल, तर मराठीत बोला नाहीतर निघा बाहेर' असे म्हणते. डब्यातील अन्य महिला देखील या मराठी विरुद्ध हिंदी वादात सामील झाल्याचे व्हिडीओत पाहायला मिळते. या एकूण प्रकरणामुळे मराठी विरुद्ध हिंदी वाद वाढत असल्याचे चित्र समोर आले आहे.

महाराष्ट्रात मागील काही दिवसांपासून मराठी विरुद्ध हिंदी हा वाद सुरु आहे. राज्य सरकारने त्रिभाषा सूत्र इयत्ता पहिलीपासून लागू करण्याचा निर्णय घेतला. यानुसार हिंदी भाषेची सक्ती करण्यात आली. हिंदीच्या सक्तीवरुन राज्यभरात नाराजी आणि संताप व्यक्त करण्यात आला. राज ठाकरे, उद्धव ठाकरे यांच्या विरोधी पक्षातील नेत्यांनी हिंदी सक्तीच्या निर्णयावरुन राज्य सरकारवर निशाणा साधला. वाढत्या विरोधामुळे सरकारने हिंदी सक्तीचा निर्णय मागे घेतला.

याचदरम्यान मीरारोड-भाईंदरमध्ये मराठी विरुद्ध हिंदी असा वाद पेटला. या परिसरातील काही व्यापाऱ्यांनी मराठी भाषिकांच्या विरोधात मोर्चा काढण्यात आला. याला प्रत्युत्तर म्हणून महाराष्ट्र नवनिर्माण सेनेकडूनही मोर्चाचे आयोजन करण्यात आले. त्यानंतर काही दिवसांनी मीरारोड-भाईंदरमध्ये मनसे प्रमुख राज ठाकरे यांनी जाहीर सभा घेतली. या एकूण प्रकरणामुळे सध्या राज्यात मराठी विरुद्ध हिंदी असा वाद पेटल्याचे पाहायला मिळत आहे.