35 गुण मिळवणारा मेरिटमध्ये येत नाही, त्यालाही अभ्यास करावा लागतो; सुधीर मुनगंटीवारांनी कुणावर साधला निशाणा?

पराग ढोबळे, साम टीव्ही

नागपूर : आगामी स्थानिक स्वराज्य संस्थाच्या निवडणुकीसाठी ठाकरे बंधूंनी जोरदार तयारी सुरु केली आहे. आगामी निवडणुका ठाकरेंची शिवसेना आणि मनसे एकत्र लढण्याची शक्यता व्यक्त केली जात आहे. या पार्श्वभूमीवर दोन्ही पक्षांच्या प्रमुख नेत्यांच्या गाठीभेटी वाढल्या आहेत. ठाकरे बंधूंच्या एकत्र येण्यावर भाजप आमदार सुधीर मुनगंटीवार यांनी निशाणा साधला आहे. 35 गुण मिळवणारा मेरिटमध्ये येत नसून त्याला अभ्यास करावा लागतो, असं म्हणत सुधीर मुनगंटीवार यांनी ठाकरे बंधूंच्या एकत्र येण्यावर निशाणा साधला.

सुधीर मुनगंटीवार यांनी नागपुरात माध्यमांशी संवाद साधला. मुनगंटीवार यांनी राज्यातील विविध घडामोडींवर भाष्य केलं. 'ते दोघेही सख्खे मावसभाऊ आहेत. ते एवढे दिवस का लावत आहेत, हेच कळत नाही. त्यांचे विचार एक आहेत. परीस असणाऱ्या बाळासाहेब ठाकरे यांचा स्पर्श त्यांना झालाय. एकतर यायला कोणाचा आक्षेप नाही. आमच्या त्यांना शुभेच्छा आहेत. पितृपक्षात त्यांची चर्चा सुरू आहे. नवरात्रापर्यंत कायमस्वरूपी एकत्र येऊन जनतेच आवाज बनावं'.

'निवडणुका जिंकायच्या असतील तर भूमिका बदलवून लोकहिताचे काम करावे लागेल. फक्त मोदींचा विरोध करून फायदा नाही. 35 मार्क घेणारा विद्यार्थी मेरिटमध्ये येत नाही. त्याला अभ्यास करावा लागतो, असे मुनगंटीवार म्हणाले.

ओबीसी-मराठा आरक्षणावरही मुनगंटीवार यांनी भाष्य केलं. 'देशाचे पंतप्रधान नरेंद्र मोदी आहेत. त्यामुळे त्यांच्या आरक्षणाला दूरदूरपर्यंत धक्का पोहचवू शकत नाही. जेव्हा काँग्रेस नेते हे मनोज जरांगे यांच्या भेटीला गेले. तेव्हा यांच्या पक्षातील काही नेत्यांनी ओबीसीमधून देण्याची मागणी केली होती. त्यांच्या लक्षात आल्यावर देऊ नये अशी मागणी करत आहेत. ओबीसी किंवा मराठा कोणत्याही समाजावर अन्याय होणार नाही, असे सुधीर मुनगंटीवार म्हणाले.

छगन भुजबळ यांच्या भूमिकेवर भाष्य करताना मुनगंटीवार म्हणाले, 'छगन भुजबळ ओबीसी समाजासाठी कॅबिनेटमध्ये आग्रही भूमिका मांडतात. त्यांनी मांडलेल्या भूमिकेवर तेच अधिक स्पष्ट बोलतील'.