पाणी आणायला गेले, घरी परतलेच नाहीत, मायलेकाचा मृत्यू; हृदयद्रावक घटनेनं अख्खा गाव हळहळला

विजय पाटील, साम टीव्ही

सांगली, डफळापूर (ता. जत): येथील एका शेततलावात बुडून माय-लेकाचा दुर्दैवी मृत्यू झाल्याची घटना बुधवारी (दि. 25) सकाळी साडेनऊच्या सुमारास घडली. या घटनेत कर्नाटकातील अकोळ (ता. निपाणी, जि. बेळगाव) येथील सुशीला विट्ट्याप्पा पडोळकर (वय 60) आणि त्यांचा मुलगा अनिल विट्ट्याप्पा पडोळकर (वय 25) यांचा जागीच मृत्यू झाला.

मिळालेल्या माहितीनुसार, मेंढपाळांचा ताफा मंगळवारी बाज येथून तळ उठवून डफळापूरजवळील दिलीप भोसले यांच्या मळ्यात सुमारे 800 मेंढ्यांसह मुक्कामाला थांबला होता. शेततलावालगत तळ ठोकण्यात आला होता. बुधवारी सकाळी सुशीला पडोळकर या पाणी आणण्यासाठी शेततलावात उतरल्या असता त्यांचा पाय घसरून त्या पाण्यात पडल्या. त्यांच्या आरडाओरडीनंतर त्यांना वाचवण्यासाठी चार नातेवाईकांनी तलावात उड्या मारल्या.

मात्र तलावात सुमारे 11 फूट पाणी असून, प्लास्टिक अस्तर असल्याने पाय घसरत होते आणि हाताला धरायला आधार मिळत नसल्याने सर्वचजण अडचणीत सापडले. सुमारे 15 मिनिटे जीव वाचवण्यासाठी धडपड सुरू असताना शेजारील शेतकऱ्यांनी तत्काळ मदतीला धाव घेत दोर टाकून हल्लाप्पा बासणे, सुनिता बासणे व लक्काप्पा पडोळकर यांना सुरक्षित बाहेर काढले. मात्र सुशीला पडोळकर आणि अनिल पडोळकर या माय-लेकरांना वाचवण्यात अपयश आले.

या घटनेची नोंद जत पोलीस ठाण्यात करण्यात आली असून पुढील तपास हवालदार भाऊसाहेब कुंभार करत आहेत. या झालेल्या दुर्दैवी घटनेमुळे परिसरात हळहळ व्यक्त केली जात असून सर्वत्र शोककळा पसरली आहे.