Air India Plane Crash: मुलगा अन् सासूला घेऊन लंडनला निघाली, अहमदाबाद विमान अपघातामध्ये नागपूरच्या महिलेचा कुटुंबासह मृत्यू

गुजरातच्या अहमदाबादमध्ये मोठी विमान दुर्घटना घडली. लंडनला जाणारे एअर इंडियाचे विमान टेकऑफ घेतल्यानंतर कोसळले. या विमान अपघातामध्ये २४२ प्रवाशांचा मृत्यू झाला. मृतांमध्ये नागपूरच्या एका महिलेसह तिच्या कुटुंबाचा देखील समावेश आहे. मूळच्या नागपूरच्या असणाऱ्या यशा कामदार यांच्यासह त्यांची सासू आणि मुलाचा या विमान अपघातामध्ये मृत्यू झाल्याची माहिती समोर आली आहे.

मिळालेल्या माहितीनुसार, अहमदाबाद विमान अपघातामध्ये यशा कामदार, त्यांचा मुलगा रुद्र आणि सासू रक्षा मोढा यांचा मृत्यू झाला. यशा कामदार यांचे माहेर नागपूरचे आहे. नागपुरमधील क्वेटा कॉलनीत त्या राहत होत्या. यशा कामदार या आपल्या मुलाला आणि सासूला घेऊन लंडनला निघाल्या होत्या. पण लंडनला जाण्यापूर्वीच अनर्थ घडला आणि या विमान अपघातामध्ये तिघांचाही दुर्दैवी मृत्यू झाला.

नागपूरमधील स्थानिक माजी नगरसेवक मनोज चाफले यांनी सांगितले की, 'यशा कामदार यांच्या कुटुंबीयांना अपघाताची माहिती मिळताच ते अहमदाबादसाठी रवाना झाले. यशाचे तीन ते चार वर्षापूर्वी लग्न झाले होते. तिला दीड वर्षांचा मुलगा होता. यशाचे सासरचे आडनाव मोडा आहे. ते सर्वजण अहमदाबादमध्ये राहतात.

मनोज चाफले यांनी सांगितले की, 'यशा, तिचा मुलगा आणि सासू हे सर्वजण अहमदाबादवरून शोकसभेसाठी लंडनला जाण्यासाठी निघाले होते आणि ही दुर्दैवी घटना घडली. ही ऐवढी मोठी दुर्घटना घडल्यामुळे इशाच्या कुटुंबीयांना मोठा धक्का बसला.' तसंच, यशा कामदार मोढा या लंडनला जाण्यासाठी निघाल्या होत्या. त्यांच्या कागदपत्रांमध्ये अपूर्णता सुद्धा होती. पण त्यांनी विनंती करून हा सगळा प्रवास केल्याची माहिती समोर आली आहे.