Air India Plane Crash: दैवी चमत्कार! अहमदाबाद विमान दुर्घटनेतील एक प्रवासी जिवंत; पाहा VIDEO

अहमदाबाद विमान अपघाताबाबत मोठी बातमी समोर आली आहे. या विमान अपघातामध्ये एक प्रवासी बचावला. रमेश विश्वकुमार असं या प्रवाशाचे नाव आहे. पोलिस आयुक्त जीएस मलिक यांनी ही माहिती दिली. या प्रवाशावर मेडिकल कॉलेजमध्ये उपचार सुरू आहेत. या प्रवाशाची प्रकृती गंभीर आहे.

गुजरातमधील अहमदाबादमध्ये आज दुपारी पावणे दोनच्या सुमारास एअर इंडियाच्या विमानाला अपघात झाला. एअर इंडियाचे विमान टेकऑफ घेतल्यानंतर अचानक कोसळले. सरदार वल्लभभाई पटेल आंतरराष्ट्रीय विमानतळाजवळ ही घटना घडली. हे विमान मेघानीनगर या रहिवासी परिसरात कोसळल्यानंतर भीषण आग लागली. अपघातानंतर विमानाचे अक्षरश: तुकडे-तुकडे झाले. फक्त विमानाचा सांगाडा राहिला आहे.

या दुर्घटनेमध्ये विमानातील २४२ प्रवाशांचा मृत्यू झाल्याची माहिती समोर आली होती. अपघातानंतर विमानाने पेट घेतल्यामुळे सर्व प्रवाशांचा होरपळून मृत्यू झाला. या अपघातामध्ये एक प्रवासी सुदैवाने बचावला आहे. या प्रवाशाचे नाव रमेश विश्वकुमार असल्याची माहिती समोर आली आहे. रुग्णालयात त्याच्यावर उपचार सुरू आहे. या प्रवाशाने अपघातादरम्यान विमानातून उडी मारून आपला जीव वाचवला असल्याचे सांगितले जात आहे.

अपघातग्रस्त विमान अहमदाबादवरून लंडनला जात होते. एअर इंडियाच्या या विमानात १६९ भारतीय प्रवासी, ५३ ब्रिटीश प्रवासी, ७ पोर्तग्रीज प्रवासी आणि १ कॅनेडियन प्रवासी प्रवास करत होते. त्याचसोबत या विमानात १० कॅबिन क्रू आणि २ पायलट हे देखील होते. प्रवाशांमध्ये गुजरातचे माजी मुख्यमंत्री विजय रुपाणी यांचा देखील समावेश होता. या विमानाने अहमदाबाद विमानतळावरुन उड्डाण घेतलं होतं. उड्डाण घेतल्यानंतर काही मिनिटातच हे विमान कोसळले. ७०० फुटांहून खाली कोसळल्यानंतर या विमानाने पेट घेतला.