Air India: शब्द पण फुटेना, डोळ्यात पाणी, याच विमानाने बहीण लंडनला निघाली होती, त्याआधीच कोसळलं; नातेवाईकांचा आक्रोश

गुजरातच्या अहमदाबाद शहरातील मेघानीनगर परिसरात आज एक भीषण विमान अपघात घडला. टेकऑफनंतर प्रवासी विमान कोसळलं, आणि क्षणात संपूर्ण परिसर हादरून गेला. अपघातानंतर अग्निशमन दलाच्या ३ गाड्या घटनास्थळी दाखल झाल्या आहेत. बचावकार्य युद्धपातळीवर सुरू असून, अपघातग्रस्तांना अहमदाबाद येथील सिव्हिल हॉस्पिटलमध्ये दाखल करण्यात आले आहे. अपघात घडल्यानंतर रूग्णालयात प्रवाशांच्या कुटुंबीयांनी गर्दी केली आहे. आपल्या नातेवाईकांचा शोध घेत आहेत.

रूग्णालयात भावना पटेल या महिला आपल्या बहिणीचा शोध घेत होते. त्यांनी आपली प्रतिक्रिया दिली आहे, 'माझी बहीण लंडनला जात होती. दुपारी १.१० वाजता तिची फ्लाईट होती, पण लंडनला पोहोचण्यापूर्वीच फ्लाईट क्रॅश झाली' अशी त्यांनी प्रतिक्रिया दिली.

ज्या भींतीवर विमान कोसळलं, त्या इमारतीत रमिला यांचा मुलगाही होता. "माझा मुलगा जेवणाच्या सुट्टीत हॉस्टेलमध्ये गेला होता आणि तिथेच विमान कोसळले. माझा मुलगा सुरक्षित आहे आणि मी त्याच्याशी बोलले आहे. त्याने दुसऱ्या मजल्यावरून उडी मारली, त्यामुळे त्याला थोडी दुखापत झाली," अहमदाबादमधील सिव्हिल हॉस्पिटलमध्ये पोहोचल्यानंतर त्यांनी ही माहिती दिली.

वहिनीला एअरपोर्टवर सोडायला आलेल्या दीराने आपली प्रतिक्रिया दिली, "माझी वहिनी लंडनला जात होती. तासाभरातच मला विमान कोसळल्याची बातमी मिळाली. म्हणून मी इथे आलो आहे, मला अजून रूग्णालयात एन्ट्री मिळाली नाही" गुजरातमधील अहमदाबाद येथील सिव्हिल हॉस्पिटलमध्ये पोहोचताना पूनम पटेल म्हणाले.

या अपघातग्रस्त विमानात एकूण २४२ प्रवासी प्रवास करीत होते. त्यातील २३० प्रवासी होते. तर,१२ क्रू मेंबर होते. त्यांचाही शोध सुरू आहे. सध्या कुटुंबियांनी रुग्णालयात धाव घेतली असून, आपल्या नातेवाइकांचा शोध घेत आहेत.