नवरा-बायकोमधील वाद टोकाला भिडला,पतीनं पत्नीचा गळा चिरला अन्...; दुहेरी हत्याकांडानं नांदेड हादरलं

नवरा-बायकोमध्ये भांडण होणं हे सामान्य गोष्ट आहे. बहुतेक जोडप्यांमध्ये वाद होत असतात. पण काहीवेळा हे वादामुळे सुखी संसाराची राख रांगोळी होत असते. अशीच एक धक्कादायक घटना नांदेडच्या हिमायतनगरमध्ये घडली आहे. पतीने पत्नीची हत्या केल्यानंतर आत्महत्या करत मृत्यूला कवटाळलं अन् सुखी संसार उद्धवस्त झाला.

दुहेरी हत्याकांडाची घटना हिमायतनगर तालुक्यातील बोरगडी तांडा येथे घडली आहे. पायल विनोद राठोड आणि पती विनोद राठोड, अशी मृतांची नावे आहेत. हाती आलेल्या माहितीनुसार, पायल आपल्या चुलत भावाच्या लग्नासाठी माहेरी आली होती. तिच्यासोबत तिचा पती विनोद राठोड (वय ३५) हा ही आला होता. ते तीन दिवसापासून तांडा येथे आले होते. या दोघांना दोन मुली आणि आठ महिन्याचा मुलगा आहे.

परंतु या दोघांमध्ये ११ मे रोजी काहीतरी वाद झाला. मध्यरात्री नवरा-बायकोमध्ये कडाक्याचं भांडण झालं. यादरम्यान रागाच्या भरात पती विनोदने धारदार शस्त्राने पत्नी पायलच्या गळ्यावर वार केला. रक्तबंबाळ झालेली पायल जागीच कोसळली.

पत्नीची हत्या केल्यानंतर पती विनोद तेथून पसार झाला होता. दुसऱ्या दिवशी १२ मे रोजी धानोरा शिवारातील एका झाडाला त्याचा मृतदेह लटकलेल्या अवस्थेत आढळून आला. विनोद आणि पायल यांना तीन मुले आहेत. सुखी संसार असताना एवढे टोकाचे पाऊल का उचलले, याचा तपास पोलिस करत आहेत.या घटनेमुळे बोरगडी तांडा व परिसरात हळहळ व्यक्त होत आहे.

व्यावसायिक तरुणीच्या हत्येनं पुण्यात खळबळ

पुण्यातील मुंढवा परिसरात तरुणीच्या हत्येची घटना घडली आहे. ज्या तरुणीची हत्या झाली आहे, ती ब्युटीपार्लरचा व्यवसाय करत होती. कचरा डेपोजवळ तिचा मृतदेह आढळला आहे. पोलिसांनी दिलेल्या माहितीनुसार, तिची गळा आवळून हत्या करण्यात आली आहे. दरम्यान पोलिसांनी आरोपीला बेड्या ठोकल्या आहेत. आफरीन सलीम पठाण असं हत्या झालेल्या तरुणीचं नाव आहे. ती वडगाव शेरी येथे राहत होती. ती मूळची पालघर येथील रहिवासी होती. गोरखनाथ देवराव शिंदे असं अटक केलेल्या आरोपीचे नाव आहे. तो सध्या चंदननगरमध्ये राहत होता.