Virar Crime: भरदिवसा RTI कार्यकर्त्याची दगडाने ठेचून निर्घृण हत्या; विरार हादरलं!

मनोज तांबे, साम प्रतिनिधी

पालघर जिल्ह्यातील विरारमध्ये भरदिवसा RTI कार्यकर्त्याची दगडाने ठेचून निर्घृण हत्या झाल्याची घटना घडली आहे. आत्माराम पाटील असे मृत व्यक्तीचे नाव आहे. विरार पूर्वेतील शिरगाव परिसरातील खदानीत RTI कार्यकर्त्याचा मृतदेह सापडला आहे. विशेष म्हणजे ही घटना मंडळ अधिकारी प्रभाकर पाटील यांच्या समोरच घडली. या हल्ल्यात प्रभाकर पाटील किरकोळ जखमी झालेत. त्यांच्या वाहनाचीही मोठ्या प्रमाणात तोडफोड करण्यात आली आहे.

प्राथमिक माहितीनुसार, या प्रकरणात खदान मालक महेश पाटील याचे नाव समोर आले आहे. पोलिसांनी तपासाची चक्रे वेगाने फिरवली आहेत. घटनेची माहिती मिळताच विरार पोलिस तसेच फॉरेन्सिक पथक घटनास्थळी दाखल झाले आहे. याप्रकरणाचा तपास करणारे सुहास बावचे, पोलीस उपायुक्त यांनी दिलेल्या माहितीनुसार, शिरगाव येथील खदानीबाबत तक्रार आली होती. ही तक्रार अमित चौधरी नावाच्या व्यक्तीने दिली होती. या तक्रारीवरून तहसीलदार यांच्या आदेशावरून मंडलाधिकारी प्रभाकर पाटील पाहणी करण्यासाठी गेले होते.

त्यावेळी क्रेसर, खदानी संदर्भातील लोकांनी आत्माराम पाटील आणि मंडळ अधिकारी यांना लाठीकाठीने आणि दगडाने मारहाण केली. आत्मराम पाटील यांची दगडाने ठेचून हत्या करण्यात आली. या प्रकरणात 10 ते 12 जणांनी ही हत्या केली असून, 2 जणांना ताब्यात घेतले आहे तर अन्य आरोपींच्या शोधासाठी पोलीस पथक रवाना केले आहेत. याबाबत विरार पोलीस ठाण्यात गुन्हा दाखल करण्याची प्रक्रिया सुरू आहे. महेश पाटील, आणि त्यांचे वडील, मुलगा आणि इतर सहकाऱ्यांनी आत्मराम पाटील यांची हत्या केली. दरम्यान आत्माराम पाटील हे माहितीच्या अधिकाराचा वापर करून अनेक बेकायदेशीर कामांचा पर्दाफाश करत असत.

दरम्यान विरारच्या शिरगाव खदान प्रकरणातील मृत आत्माराम पाटील यांच्या कुटुंबीयांचा विरार पोलीस ठाण्यात राडा घातला आहे. आगरी समाजातील सर्व पुरुष महिला विरार पोलीस ठाण्यात एकत्रित येत न्याय देण्याची मागणी केली. आमच्या वडिलांना जर न्याय दिला नाही तर आम्ही मृतदेह स्वीकारणार नाही. मृतदेह थेट पोलीस ठाण्यात आणून टाकू अशी कुटुंबियांनी आक्रमक भूमिका घेतली आहे. तब्बल अर्ध्या तासापासू कुटुंबीयांनी विरार पोलीस ठाण्यात राडा घालण्यास सुरुवात केली आहे.