Success Story: शिक्षणासाठी घरापासून लांब राहिली, एकदा नव्हे तर दोनदा क्रॅक केली UPSC; IAS नम्रता जैन यांचा प्रेरणादायी प्रवास

यूपीएससी ही देशातील सर्वात अवघड परीक्षा मानली जाते. ही परीक्षा देऊन लाखो तरुणांना प्रशासकीय सेवेत रुजू व्हायचं असतं. मात्र, अनेकदा पदरात अपयश येते. कितीही अपयश आले तरीही हार मानायची नाही. परिस्थिती कितीही बिकच असली तरीही त्यावर मात करायची. त्यासाठी मेहनत करायची. असंच काहीसं आयएएस नम्रता जैन यांनीदेखील केला.

नम्रता जैना या मूळच्या छत्तीसगडमधील दंतेवाडा येथील रहिवासी. हा परिसर नक्षलवादीग्रस्त होता. तेथे बेरोजगारी आणि इतर अनेक गोष्टींमुळे अडचणी होत्या. परंतु अशा परिस्थितीतही त्यांनी आपली मेहनत सुरु ठेवली. त्या ठिकाणी व्यवस्थित इंटरनेट सेवादेखील नव्हती. तरीही त्यांनी आपले आणि कुटुंबाचे नाव मोठे केले. या संपूर्ण प्रवासात त्यांच्या आईने त्यांची खूप साथ दिली. त्या त्यांच्या पाठीशी खंबीरपणे उभ्या राहिल्या.

IAS नम्रता जैन यांचे शिक्षण

आयएएस नम्रता जैन यांनी सुरुवातीचे शिक्षण कारली येथील निर्मल निकेतन शाळेतून घेतले. त्यांना १०वीची परीक्षा पास करण्यासाठी अनेक अडचणी आल्या. त्यानंतर त्यांना शिक्षणासाठी बाहेर जावे लागले. यासाठी घरातून विरोध होता. परंतु त्यांच्या आईने कुटुंबातील इतर सदस्यांना तयार केले. १२वीची परीक्षा दिल्यानंतर त्यांनी भिलाई इन्स्टिट्यूट ऑफ टेक्नोलॉजीमधून बीटेक पूर्ण केले.

नम्रता या आठवीत होत्या. तेव्हा एका कार्यक्रमात कलेक्टर भाषण करत होत्या. तेव्हा त्यांच्या वडिलांनी आयएएस ऑफिसरच्या कामाबद्दल त्यांना सांगितले. त्यानंतर त्यांनी आयएएस अधिकारी होण्याचे ठरवले. परीक्षेच्या आधी सहा महिने त्यांच्या दोन काकांचे निधन झाले. यामुळे त्या खूप खचल्या होत्या. परंतु त्यांचे स्वप्न पूर्ण करण्यासाठी नम्रता यांनी खूप मेहनत घेतली.

पहिल्या प्रयत्नात अपयश, दुसऱ्या प्रयत्नात यूपीएससी क्रॅक

नम्रता यांनी २०१५ मध्ये पहिल्यांदा यूपीएससी (UPSC) परीक्षा दिली. त्यात त्यांना अपयश मिळाले. दुसऱ्या प्रयत्नात त्यांना ९९ रँक मिळाली आणि त्या आयपीएस अधिकारी झाल्या. परंतु त्यांचे आयएएस होण्याचे स्वप्न होते. त्यांनी पुन्हा २०१८ मध्ये यूपीएससी परीक्षा दिली. यात त्यांना १२वी रँक प्राप्त झाली आणि त्या आयएएस अधिकारी झाल्या.