एशिया कप 2025 मध्ये टीम इंडियाने पाकिस्तानचा 5 विकेट्सने पराभव केला. ऐतिहासिक विजय मिळवला. संपूर्ण स्पर्धेदरम्यान पाकिस्तानचा खेळ निराशाजनक राहिला आणि पराभवानंतरही त्यांची एशिया कपमधील निरोपाची वेळही वादांनी भरलेली ठरली.

पाकिस्तानचे गृह मंत्री आणि एशियाई क्रिकेट परिषदेचे (ACC) प्रमुख मोहसिन नकवी यांच्यावर “ट्रॉफी चोर” अशी टीका सुरू झालीये. भारताच्या विजयानंतर नकवी यांनी टीम इंडियाला ट्रॉफी देण्यास नकार दिला होता. त्यानंतर त्यांनी एक नवीन अट ठेवत नवीन वाद उभा केला आहे.

नकवींची अट काय आहे?

मोहसिन नकवी यांनी विजेत्या टीम इंडियाला एशिया कपची ट्रॉफी आणि पदकं देण्याची इच्छा व्यक्त केली आहे. मात्र त्यासाठी त्यांनी एक अट घातली आहे. त्यांनी स्पष्ट केलं आहे की, ‘औपचारिक समारंभ’ आयोजित केला गेला तरच ते भारताला ट्रॉफी देतील.

क्रिकबझच्या अहवालानुसार, नकवी यांनी ही अट एशिया कप आयोजकांना सांगितली आहे. मात्र, सध्या असा कोणताही समारंभ आयोजित होण्याची शक्यता फारच कमी मानली जाते.

BCCI उचलणार कडक पाऊल

नकवी भारताच्या अवॉर्ड सेरेमनीनंतर लगेचच स्टेडियममधून निघून गेले. परंतु हा वाद इथेच थांबला नाही. बीसीसीआयने नोव्हेंबरमध्ये होणाऱ्या आंतरराष्ट्रीय क्रिकेट परिषदेच्या (ICC) बैठकीत हा मुद्दा मांडण्याचा निर्णय घेतला आहे. याशिवाय मंगळवारी म्हणजेच आज दुबईमध्ये होणाऱ्या एसीसीच्या बैठकीतही बीसीसीआय हे प्रकरण उपस्थित करणार आहे. ही बैठक भारतीय वेळेनुसार दुपारी 3.30 वाजता सुरू होणार आहे.

भारताने एशिया कपमध्ये पाकिस्तानविरुद्ध तीन सामने खेळले आणि तिन्ही वेळा पाकिस्तानला पराभवाचा सामना करावा लागला. प्रत्येक सामन्यानंतर पाकिस्तानकडून काहीतरी गोंधळ निर्माण करण्यात आला. कधी हँडशेक वाद, कधी ‘प्लेन क्रॅश’ सेलिब्रेशनवरून गोंधळ, तर आता मोहसिन नकवी यांनी ट्रॉफीवरून नवा वाद निर्माण केला आहे.

कधी मिळणार टीम इंडियाला ट्रॉफी

आता सर्वांचं लक्ष या गोष्टीकडे लागलंय की, एशिया कपची ट्रॉफी अधिकृतरीत्या भारताच्या खात्यात कधी आणि कशा प्रकारे येणार. मात्र एक गोष्ट स्पष्ट आहे की, मैदानात तसंच मैदानाबाहेरही पाकिस्तानला या स्पर्धेत पराभवाचाच सामना करावा लागला आहे.