भारत आणि श्रीलंका यांच्यातील वनडे मालिकेतील तिसऱ्या सामन्यात भारतीय संघाला पराभवाचा सामना करावा लागला आहे. कोलंबोतील प्रेमदासा स्टेडियमवर पार पडलेल्या या सामन्यात भारतीय संघाला जिंकण्यासाठी २४९ धावा करायच्या होत्या. मात्र या धावांचा पाठलाग करताना भारतीय संघाचा डाव अवघ्या १३८ धावांवर आटोपला आहे. यासह भारतीय संघाने हा सामना ११० धावांनी गमावला असून ३ वनडे सामन्यांची मालिका २-० ने गमावली आहे. ाा

भारतीय संघासमोर २४९ धावांचं आव्हान

या सामन्यात भारतीय संघाला जिंकण्यासाठी २४९ धावांचं आव्हान होतं. पॉवरहाऊस भारतीय संघासाठी हे आव्हान तितकं मोठं नव्हतं. या सामन्यात भारतीय सलामी जोडीला हवी तशी सुरुवात करुन देता आली नाही. शुभमन गिल १४ चेंडूत ६ धावा करत माघारी परतला. त्यानंतर रोहित शर्माने २० चेंडूत ३५ धावा करत पॅव्हेलियनची वाट धरली. विराट कोहलीकडून या सामन्यातही मोठ्या खेळीची अपेक्षा होती. मात्र तो १८ चेंडूत २० धावा करात माघारी परतला.

मध्यक्रम पुन्हा एकदा फ्लॉप

या मालिकेतील तिन्ही सामन्यांमध्ये भारतीय संघाचा मध्यक्रम फ्लॉप ठरला आहे. या सामन्यात रिषभ पंत ९ चेंडूत अवघ्या ६ धावा करत माघारी परतला.त्यानंतर फलंदाजीला आलेला श्रेयस अय्यर ७ चेंडूत ८ धावा करत तंबूत परतला. गेल्या दोन्ही सामन्यात शेवटी येऊन भारतीय संघाचा डाव सांभाळणारा अक्षर पटेल या सामन्यात मात्र मोठी खेळी करु शकला नाही. तो अवघ्या २ धावा करत माघारी परतला. तर आपला पहिलाच सामना खेळत असलेल्या रियान परागने १५ तर शिवम दुबेने अवघ्या ९ धावा केल्या. शेवटी वॉशिंग्टन सुंदरने मोलाच्या धावा केल्या. पण या धावा संघाला विजय मिळवून देण्यासाठी पुरेशा नव्हत्या.

मालिकेतील तिन्ही सामन्यात श्रीलंकेचे फिरकी गोलंदाज भारतीय फलंदाजांवर भारी पडले. या तिन्ही सामन्यांमध्ये भारतीय फलंदाज श्रीलंकेच्या फिरकी गोलंदाजांच्या फिरकी गोलंदाजांच्या तालावर नाचताना दिसून आले. पहिला सामना बरोबरीत राहिल्यानंतर पुढील दोन्ही सामन्यांमध्ये भारतीय संघाला पराभवाचा सामना करावा लागला आहे. त्यामुळे भारतीय संघाला तब्बल २७ वर्षांनंतर श्रीलंकेविरुद्धची वनडे मालिका गमवावी लागली आहे.