देशात व्यावसायिकांवर गोळीबाराच्या घटना सुरूच असल्याचे पाहायला मिळत आहे. मुंबईनंतर आता दिल्लीत गोळीबाराची घटना घडली. दिल्लीच्या पश्चिम विहारात व्यावसायिकाची गोळ्या झाडून हत्या करण्यात आली. हल्लेखोरांनी व्यावसायिकावर १० राऊंड फायरिंग केली. हल्लेखोरांनी अगदी जवळून व्यावसायिकावर गोळ्या झाडल्या आहेत. व्यावसायिकावर गोळीबार झाल्यानंतर परिसरात एकच खळबळ उडाली. घटनेची माहिती मिळताच पोलिसांनी घटनास्थळी धाव घेतली.

दिल्लीच्या पश्चिम विहारात शुक्रवारी सकाळी गोळीबाराची घटना घडली. गोळीबारात व्यावसायिक जखमी झाला. त्यानंतर त्याच्या नातेवाईकांनी तातडीने रुग्णालयात दाखल केले. मात्र, डॉक्टरांनी व्यावसायिकाला मृत घोषित केले. मृत व्यावसायिकाच्या नातेवाईकांनी सांगितलं की, 'त्यांच्या मुलाची कोणासोबत शत्रूत्व नव्हतं. ते रोज कारने जिम करण्यासाठी जायचे. ते पेशाने प्रॉपर्टी डिलर होते'.

घरातून जिमला जाताना गोळीबार

मिळालेल्या माहितीनुसार, घरातून जिमला जाताना व्यावसायिकावर गोळीबार झाल्याची घटना घडली. हल्लेखोरांनी आधी राजकुमार यांना घेरलं. त्यानंतर त्यांनी ८ ते १० राऊंड फायरिंग केली. गोळ्यांच्या आवाजाने परिसरात खळबळ उडाली. हल्लेखोरांनी व्यावसायिक राजकुमार यांची हत्या करून फरार झाले. व्यावसायिकाची हत्या केल्यानंतर लोक घटनास्थळी जमा झाले. त्यानंतर पोलीसही घटनास्थळी पोहोचले.

राजकुमार पश्चिम विहार भागात राहत होते. राजकुमार प्रॉपर्टी डिलर म्हणून काम करत होते. राजकुमार कारमध्ये असताना हल्लेखोरांनी त्यांच्यावर हल्ला केला. कारमध्ये बेसावध असल्याची संधी साधून हल्लेखोरांनी गोळीबार केला. पोलिसांनी घटनेनंतर तातडीने तपासाला सुरुवात केली आहे. पश्चिम विहार भागातील सीसीटीव्ही तपासण्यास सुरुवात केली आहे. तसेच राजकुमार यांच्या नातेवाईकांची चौकशी सुरु करण्यात आली आहे. पोलिसांनी हल्लेखोरांचा तपास करण्यास सुरुवात केली आहे.

राजधानी दिवसाढवळ्या घडलेल्या गोळीबाराच्या घटनेने खळबळ उडाली आहे. गोळीबारामुळे नागरिक दहशतीत आहेत. व्यावसियाकाची गोळ्या झाडून हत्या करण्यात आल्याने कायदा सुव्यवस्थेवर प्रश्न चिन्ह उपस्थित केले जात आहे.