संघर्ष गांगुर्डे, साम टीव्ही

ठाणे जिल्ह्यातील उसटणे गावात अवैधरित्या साठवून ठेवलेल्या हायड्रोकार्बन पेट्रोलियम पदार्थांवर अन्न, नागरी पुरवठा व ग्राहक संरक्षण विभागाच्या राज्य दक्षता पथकाने मोठी कारवाई केली आहे. या कारवाईत सुमारे १ कोटी २० लाख रुपयांचा मुद्देमाल जप्त करण्यात आला असून संबंधित आरोपींविरोधात गुन्हा दाखल करण्याची प्रक्रिया सुरू करण्यात आली आहे.

खाण्याच्या तेलाच्या टँकरचा वापर करून त्यामध्ये हायड्रोकार्बन पेट्रोलियम पदार्थांची अवैधरित्या साठवणूक व विक्री केली जात असल्याची गोपनीय माहिती राज्य दक्षता पथकाला मिळाली होती. या माहितीच्या आधारे पथकाने उसटणे गावातील संबंधित ठिकाणी छापा टाकला. तपासादरम्यान मोठ्या प्रमाणात पेट्रोलियम पदार्थांचा साठा तसेच त्यासाठी वापरण्यात येणारी वाहने आणि अन्य साहित्य आढळून आले. नियंत्रक शिधावाटप अधिकारी चंद्रकांत डांगे यांच्या मार्गदर्शनाखाली ही कारवाई करण्यात आली. राज्य दक्षता पथकाच्या अधिकाऱ्यांनी संपूर्ण परिसराची पाहणी करून अवैध साठा जप्त केला. प्राथमिक तपासात या पदार्थांची बेकायदेशीर विक्री होत असल्याचे निष्पन्न झाले आहे.

या कारवाईबाबत माहिती देताना अन्न व नागरी पुरवठा विभागाचे अधिकारी रामराजे भोसले यांनी सांगितले की, शासनाच्या नियमांचे उल्लंघन करून पेट्रोलियम पदार्थांचा अवैध साठा व व्यापार करणाऱ्यांविरोधात कठोर कारवाई केली जाईल. अशा प्रकारच्या गैरव्यवहारांना आळा घालण्यासाठी राज्य दक्षता पथक सातत्याने कारवाई करत असून पुढील काळातही अशा धडक मोहिमा सुरू राहणार आहेत. या कारवाईमुळे परिसरात अवैध पेट्रोलियम व्यवसाय करणाऱ्यांमध्ये खळबळ उडाली असून, संबंधित प्रकरणाचा पुढील तपास सुरू आहे.