वीज समस्येवर जनआक्रोश; 700 नागरिकांचा सह्यांमधून संताप

संघर्ष गांगुर्डे, साम टीव्ही

टिटवाळ्यातील वाढत्या वीज समस्यांविरोधात सुरू करण्यात आलेल्या जनआंदोलनाला नागरिकांचा अभूतपूर्व प्रतिसाद मिळत असून, अवघ्या एका दिवसात 700 हून अधिक नागरिकांनी सह्या करून आपल्या संतापाला वाट मोकळी करून दिली आहे. जनतहित फाउंडेशनचे संस्थापक रितेश कांबळे यांच्या नेतृत्वाखाली मांडा पूर्व येथील बँक ऑफ महाराष्ट्रसमोर सुरू असलेल्या या सह्या मोहिमेची सध्या संपूर्ण टिटवाळ्यात चर्चा रंगली आहे.

परिसरात वारंवार होणारी वीज खंडिती, कमी-जास्त दाबाचा वीजपुरवठा आणि त्यामुळे निर्माण होणाऱ्या गैरसोयींमुळे नागरिकांमध्ये तीव्र नाराजीचे वातावरण आहे. हजारो ग्राहकांकडून नियमितपणे वीजबिलाच्या स्वरूपात महसूल वसूल केला जात असताना देखील सुरळीत आणि दर्जेदार वीजसेवा मिळत नसल्याचा आरोप नागरिकांकडून करण्यात येत आहे.

या पार्श्वभूमीवर रितेश कांबळे यांनी लोकशाही मार्गाने नागरिकांना एकत्र आणत सह्या मोहीम सुरू केली. या मोहिमेला मिळालेल्या प्रतिसादावरून वीज प्रश्न आता केवळ पुरवठ्यापुरता मर्यादित न राहता जनभावनांचा विषय बनल्याचे स्पष्ट होत आहे. आज नाही तर कधीच नाही या भूमिकेतून अनेक नागरिक आंदोलनस्थळी उपस्थित राहत असून, आपल्या हक्कासाठी संघटितपणे आवाज उठविण्याची वेळ आता आल्याची भावना व्यक्त करत आहेत. केवळ सोशल मीडियावर नाराजी व्यक्त करून प्रश्न सुटणार नाहीत, तर लोकशक्तीच्या माध्यमातून प्रशासनाला जागे करणे आवश्यक असल्याचा सूर नागरिकांमधून उमटत आहे.

वीज समस्यांवर तातडीने आणि कायमस्वरूपी उपाययोजना करण्यात याव्यात, अशी मागणी आंदोलनकर्त्यांनी केली आहे. तसेच प्रशासनाने या मागण्यांकडे दुर्लक्ष केल्यास नागरिकांच्या व्यापक सहभागातून आणखी तीव्र जनआंदोलन उभारण्यात येईल, असा इशाराही देण्यात आला आहे. टिटवाळ्यातील या आंदोलनाला दिवसेंदिवस वाढते जनसमर्थन मिळत असून, महावितरण आणि प्रशासन याकडे कितपत गांभीर्याने पाहते, याकडे संपूर्ण परिसराचे लक्ष लागले आहे.