Summary -

• मुंबईत मतदार यादीतील सर्वात मोठा घोळ उघड झाला आहे

• मुंबईत फक्त दुबार आणि तिबार मतदार नाहीत

• तर ४ जणांची १०३ वेळा नावं मतदारयादीत आढळून आली आहेत

विकास मिरगणे, मुंबई

मुंबई महापालिका निवडणुकीसाठीच्या मतदार यादीसंदर्भात धक्कादायक माहिती समोर आली आहे. मुंबईच्या मतदार यादीमध्ये दुबार अन् तिबार नव्हे तर १०३ बार ४ व्यक्तींची नाव आली आहे. मुंबईत तब्बल ४ लाख ३३ हजार व्यक्तींची नावे मतदार म्हणून एकापेक्षा अधिक वेळा नोंदवली गेली आहेत.

मुंबईमध्ये ४ लाख ३३ हजार व्यक्तींची नावे वारंवार नोंदवली गेल्याने अशा डुप्लीकेट मतदारांची संख्या सुमारे ११ लाखांवर पोहचली आहेत. मात्र या दुबार मतदारांची आता फोटोसहित यादी पालिकेकडे प्राप्त झाल्याने ऑफिसमध्ये बसून दुबार मतदारांवर काम केले जाणार आहे.

वार्डमध्ये दुबार मतदार आहे की नाही? हे फोटोग्राफ मतदार यादी टॅली करून वॉर्डमध्ये अधिकारी आणि कर्मचारी पाहणार आहेत. १० डिसेंबरपर्यंत पालिकेचे कर्मचारी, बीएलओ कोणाच्याही घरी जाणार नाहीत. सध्या १० डिसेंबरपर्यंत दुबार मतदारांचे परिशिष्ट १ भरून घेतले जाणार नाही. मतदान केंद्र निहाय यादी २२ डिसेंबरला जाहीर करण्यात येणार असल्याची माहिती समोर आली आहे.

महापालिका निवडणुकांसाठी सर्वच राजकीय पक्षांकडून जोरदार तयारी सुरू आहे. संभाव्य दुबार मतदारांची यादी समोर येत आहे. या दुबार मतदारांना हटवण्याची मागणी केली जात आहे. तर मुंबई महानगर पालिका क्षेत्रातील दुबार मतदार शोधण्याच्या हालचालींना देखील वेग आला आहे. तसंच राज्य निवडणूक आयोगाकडून संभाव्य दुबार मतदारांची तपासणी करा असा असे आदेश दिले आहे. दुबार मतदारांना शोधून ते कोणत्या मतदार संघात मतदान करणार याबाबत विहित नमुन्यात अर्ज भरून घेतला जाणार आहे.