- रणजीत माजगांवकर

दोघा तरुणांवर झालेल्या प्राणघातक हल्ल्यात सहभागी असणाऱ्या संशयितांना तातडीने अटक करावे या मागणीसाठी काेल्हापूर जिल्ह्यातील वडगाव नगरपालिका चौकात महिलांनी बेमुदत उपोषण सुरू केले आहे. या उपाेषणाचा आज तिसरा दिवस आहे.

अवैद्य धंद्यातून 11 मे रोजी पोलिस ठाण्याजवळच अक्षय माने व प्रभाकर कुरणे यांच्या दोन गटात वाद झाला होता. या वादात अक्षय माने याच्यावर हत्याराने वार केल्याने तो गंभीर जखमी झाला होता.

हा वाद मिटविण्यासाठी गेलेला कुरणे याचा मित्र रोहित पाटील व राहुल लोहार यांच्यावर अक्षय माने गटातील काहींनी मारहाण करत गंभीर दुखापत केली होती. मात्र याप्रकरणी पोलिसांनी एकतर्फी कारवाई करत फक्त कुरणे गटाच्या युवकांवर पोलिसांनी राजकीय दबावाखाली कारवाई केल्याचा लोहार व पाटील कुटूंबियांचा आरोप आहे.

अक्षय माने गटाच्या विरोधात फिर्याद देऊनही कोणतीही ठोस कारवाई करण्यात आली नाही. तातडीने यात सहभागी असणाऱ्या संशयित आरोपींना अटक करावी व फिर्यादीत असलेली कलमे लावावीत या मागणीसाठी शोभा बाळासो पाटील, मीना सुरेश लोहार, उमा नवनाथ हाके, शारदा जाधव या नगरपालिका चौकात उपोषणास बसल्या आहेत.

Edited By : Siddharth Latkar