Summary -

• शिरूर तालुक्यातील काळेचीवाडी येथे बिबट्याचा चिमुकल्यावर हल्ल्याचा प्रयत्न

• बिबट्याच्या हल्ल्यात चिमुकला थोडक्यात बचावला

• चिमुकल्याने प्रसंगावधान राखून घरात धाव घेतल्याने जीव वाचला

• हल्ल्याचा थरार सीसीटीव्हीत कैद झाला असून व्हिडीओ व्हायरल होत आहे

रोहिदास गाडगे, शिरूर

शिरुर तालुक्यातील पिंपरखेड गावात नुकताच १४ वर्षीय रोहन बोंबे या चिमुकल्याचा बिबट्याच्या हल्ल्यात मृत्यू झाला होता. ही घटना ताजी असतानाच खेड तालुक्यातील काळेचीवाडी येथे बिबट्याच्या हल्ल्याचा आणखी एक धक्कादायक घटना समोर आली आहे. घराच्या अंगणात झोक्यावर खेळणारा एक चिमुकला बिबट्याच्या हल्ल्यातून थोडक्यात बचावला. या घटनेचा थरार सीसीटीव्ही कॅमेऱ्यात कैद झाला आहे. हा व्हिडीओ सध्या व्हायरल होत आहे.

मिळालेल्या माहितीनुसार, खेड तालुक्यातील काळेचीवाडी येथे घराच्या अंगणात चिमुकला झोक्यावर खेळत असताना बिबट्या अचानक कुत्र्याची शिकार करण्यासाठी थेट कंपाऊंडमध्ये घुसला. काही क्षणांतच चिमुकल्याने प्रसंगावधान राखत घरात धाव घेतली. कुटुंबीयांनी आरडाओरड केल्याने बिबट्या घाबरून पळून गेला. बिबट्याच्या या थरारक हालचाली सीसीटीव्हीमध्ये स्पष्टपणे कैद झाल्या आहेत.

या घटनेनंतर परिसरात भीतीचं वातावरण निर्माण झालं असून स्थानिकांनी वनविभागाकडे तातडीने उपाययोजना करण्याची मागणी केली आहे. सध्या शिरूरमध्ये बिबट्याची दहशत वाढली आहे. बिबट्याकडून वारंवार नागरिकांवर हल्ले केले जात आहे. आतापर्यंत अनेकांचा जीव घेतला आहे. त्यामुळे नागरिक संतप्त झाले आहेत. बिबट्यांचा बंदोबस्त करा किंवा त्यांना मारून टाका अशी मागणी ग्रामस्थ करत आहेत.

दरम्यान, शिरुर तालुक्यात आणखी एक बिबट्या जेरबंद झाला असून एका बिबट्याचा खात्मा करण्यात आला आहे. तर दोन बिबटे जेरबंद करण्यात वन विभागाला यश आले आहे. संतप्त ग्रामस्थ आक्रमक झाल्यानंतर वन विभागाकडून या मोहिमेला वेग आला आहे. वनविभागाने ३० पिंजऱ्यांचे जाळे ठेवले, त्यातील पिंपरखेडमध्ये दुसरा बिबट्या जेरबंद झाला. १३ वर्षीय रोहन बोंबे ठार झाल्यानंतर त्याच गावात वनविभागाने ही मोहीम राबवलेली आहे. शिरूरसह जुन्नर, आंबेगाव आणि खेड या ४ तालुक्यातील बिबटे गुजरातच्या वनतारा आणि विविध जिल्ह्यातील वनक्षेत्रात स्थलांतरित करण्याचा निर्णय झाला आहे.