आजकाल पनीर शिवाय कोणतीही थाळी पूर्ण होत नाही. पनीरचे असंख्य प्रकार आपण खातो आणि बनवतो. पनीर लहानांपासून मोठ्यांपर्यंत सर्वजण आवडीने खातात. पनीर बाजारात महाग मिळते. तसेच त्यात भेसळ असण्याचा धोका असतो. म्हणून अनेक जण घरीच पनीर बनवतात. मात्र अनेक जणांना घरी पनीर बनवताना अडचणी येतात. पनीर छान बनत नाही. कधी त्यांची चव बिघडते तर कधी पनीर कडक होतो. या समस्या दूर सारून झटपट, मऊ पनीर घरी कसा बनवायचा जाणून घ्या.

घरी पनीर बनवायची सोपी पद्धत

साहित्य

पाणी

१ टेबलस्पून व्हिनेगर

२ लिटर फुल क्रिम दूध

कृती

सर्वप्रथम एका मोठ्या भांड्यात २ कप पाणी ओतून त्यामध्ये फुल क्रिम दूध घालावे. पाण्यामुळे दूध पातेल्याच्या तळाशी लागणार नाही. गॅस मंद आचेवर ठेवून दुधाला उकळी काढून घ्या. या दरम्यान दूध हळूहळू ढवळत राहणे गरजेचे आहे. उकळी आल्यावर गॅस बंद करा. दुसरीकडे एका छोट्या बाऊलमध्ये सम प्रमाणात व्हिनेगर आणि पाणी मिक्स करा. हे मिश्रण हळूहळू दुधामध्ये टाका आणि सतत ढवळत राहा.

थोड्यावेळाने दूध आणि पाणी वेगळ झालेल पाहायला मिळेल. एका स्वच्छ मऊ कॉटनच्या कपड्यात हे मिश्रण ओतून त्यातील जास्तीचे पाणी काढून घ्या आणि कपडा गुंडाळून ठेवा. तुम्ही पनीर मधून संपूर्ण पाणी काढण्यासाठी कापडावर वजनदार वस्तू देखील ठेवू शकता. थोड्या वेळाने पनीर कपड्यातून काढून स्वच्छ पाण्याने धुवून घ्या. अशा प्रकारे तुमचे घरगुती पनीर तयार झाले. कोणताही पदार्थ बनवा त्याला रेस्टॉरंटसारखी चव येईल.