Maharashtra politics: गुलाबराव देवकरांचा पक्षप्रवेश; महायुतीत पुन्हा धुसफूस, गुलाबराव पाटील संतापले अन् अजितदादांना घेरले|VIDEO

खानदेश भागातील मंत्री गुलाबराव पाटील यांचे कट्टर विरोधक असलेले गुलाबराव देवकर यांनी राष्ट्रवादी अजित पवार गटात प्रवेश केला. यावर मंत्री गुलाबराव पाटील यांनी देवकर यांच्यावर हल्लाबोल चढवला आहे. ज्या देवकरांनी नेहमी अजितदादांवर टीका केली, अजित दादांना काळे झेंडे दाखवले. त्याच गुलाबराव देवकरांना अजितदादांनी त्यांच्या पक्षात घेतले आहे. गुलाबराव देवकर जे आम्हाला गद्दार म्हणत होते, खोके,खोके म्हणत होते, ते काय आता ओके झाले काय? असा घणाघाती सवाल त्यांनी केला.

आपण केलेल्या भ्रष्टाचारावर पांघरून घालण्यासाठी हे लोक त्या पक्षात गेलेले आहेत. देवकर यांच्या जेव्हा शंभर गोष्टी बाहेर येतील तेव्हा अजितदादा सुद्धा म्हणतील गुलाबराव पाटील खरं बोलत होते. देवकर यांना पक्षात घेण्याआधी अजितदादांनी एकनाथ शिंदे यांच्या सोबत चर्चा करायला हवी होती. खरेच हे महायुतीचे धोरण आहे का? असेही पाटील म्हणाले. या पक्ष प्रवेशानंतर महायुतीमध्ये पुन्हा एकदा धुसपुस पाहायला मिळत आहे.