Rishabh Pant : दोन डावात दोन शतकं ठोकणाऱ्या रिषभ पंतला आयसीसीचा दणका

Rishabh Pant ने भारत विरुद्ध इंग्लंड पहिल्या कसोटी सामन्याच्या दोन्ही डावांमध्ये शतकीय कामगिरी केली आहे. एकाच कसोटी सामन्यामधील दोन्ही डावांमध्ये शतक ठोकणारा रिषभ पंत दुसरा विकेटकिपर बॅट्समॅन आहे. ही शानदार कामगिरी केल्यानंतरही पंतला आयसीसीने फटकारले आहे. रिषभ पंतवर कारवाई देखील करण्यात आली आहे.

आयसीसीने रिषभ पंतवर केलेल्या कारवाईबाबत माहिती दिली आहे. पंतने खेळाडू आणि सहाय्यक कर्मचाऱ्यांशी वाईट वागणूक करत आयसीसी आचारसंहितेच्या कलम २.८ चे उल्लंघन केले आहे. भारत विरुद्ध इंग्लंड सामन्यादरम्यान रिषभ पंतने अंपायर्सच्या निर्णयाशी असहमती दर्शवली होती, असे आयसीसीच्या निवेदनात म्हटले आहे.

पहिल्या डावामध्ये जेव्हा इंग्लंडचे बेन स्टोक्स आणि हॅरी ब्रूक हे खेळाडू फलंदाजी करत होते, त्यावेळेस रिषभ पंत चेंडू बदलण्यासाठी अंपायर्ससोबत उभा होता. अंपायर्सनी चेंडू तपासल्यानंतर तो बदलण्यास नकार दिला. अंपायर्सनी चेंडू पुन्हा एकदा तपासून बदलावा अशी पंतची इच्छा होती. पण अंपायर्सनी नकार दिल्याने त्याने चेंडू जमिनीवर जोरात फेकला. ही घटना कॅमेऱ्यामध्ये कैद झाली. याचे अनेक व्हिडीओ सोशल मीडियावर व्हायरल होत आहेत.

ग्राउंड अंपायर्स ख्रिस गॅफनी, पॉल रीफेल; थर्ड अंपायर शराफुद्दौला इब्ने शाहिद आणि फोर्थ अंपायर माइक बर्न्स यांनी रिषभ पंतवर आरोप केले. पंतने गुन्हा स्वीकारल्यामुळे त्याच्यावर कोणतीही शिस्तभंगाची सुनावणी झाली नाही आणि प्रकरण थोडक्यात मिटले. मागील २४ महिन्यातला रिषभ पंतचा हा पहिलाच गुन्हा असल्याने त्याच्या शिस्तभंगाच्या रेकॉर्डमध्ये एक डिमेरिट पॉइंट जोडण्यात आला आहे. जर पंतने पुन्हा आचारसंहितेचे उल्लंघन केले, तर त्याच्यावर दंडात्मक कारवाई केली जाईल.