MS Dhoni : पुढचा सामना खेळेन की नाही हे मलाही माहीत नाही, असं एमएस धोनी का म्हणाला? पाहा व्हिडीओ

MS Dhoni : महेंद्रसिंह धोनीचा खराब फॉर्म सुरु आहे. आयपीएल २०२५ मध्ये एमएस धोनी सतत फ्लॉप होत आहे. या सीझननंतर धोनी पुन्हा आयपीएलमध्ये खेळताना दिसणार की नाही असा प्रश्न चाहत्यांना पडला होता. अशातच महेंद्रसिंह धोनीने आयपीएलमध्ये खेळण्याबाबत महत्त्वपूर्ण विधान केले आहे. त्यामुळे धोनीच्या निवृत्तीच्या चर्चांना पुन्हा एकदा उधाण आले आहे.

पंजाबचा कर्णधार श्रेयस अय्यरने टॉस जिंकत गोलंदाजीचा निर्णय घेतला. श्रेयसने टॉस जिंकल्यानंतर प्लेईंग ११ वर भाष्य केले. त्याने ग्लेन मॅक्सवेल आयपीएलमधून बाहेर पडला असल्याचे सांगितले. मॅक्सवेलच्या बोटाला फ्रँक्चर असल्याने तो आज खेळणार नाही. त्याच्या जागी कुणाला संधी द्यावी हे अजूनही ठरले नसल्याचे अय्यरने म्हटले.

श्रेयस अय्यरनंतर महेंद्रसिंह धोनीशी डॅनी मॉरिसन यांनी संवाद साधला. धोनी बोलत असताना स्टेडियममधील सर्व चाहत्यांनी मोठ्याने जल्लोष केला. त्यावर 'तुझं स्वागत किती जोरदार होतंय. तू पुढच्या वर्षीही येथे येशील, असे समजावे का?' असा प्रश्न डॅनी मॉरिसन यांनी विचारला. प्रश्नाचे उत्तर देताना महेंद्र सिंह धोनी हसत म्हणाला, 'मी पुढच्या सामन्यात खेळण्यासाठी येईन का याची मला खात्री नाही'

'चाहत्यांचं हे प्रेम माझ्यासाठी गौरव आहे. आम्ही या सीझनमध्ये बहुतांश सामने घरच्या स्टेडियमवर खेळलो. पण घरच्या मैदानात खेळण्याचा फायदा आम्ही घेऊ शकलो नाही. सीझनमध्ये आम्ही संघात खूप बदल केले. यामागचं कारण खूप सोपं आहे. बरेच खेळाडू चांगली कामगिरी करत असतील, तर फेरबदल करता येतात. पण यंदा हे जमले नाही. याशिवाय फ्रेश ऑक्शननंतरचा हा पहिला सीझन आहे त्याचाही परिणाम झाला', असे वक्तव्य महेंद्रसिंह धोनी यांनी केले.