RCB ने ट्रॉफी जिंकली! सामना संपण्यापूर्वीच विराटचा उर भरुन आला, मैदानातच ढसाढसा रडला किंग कोहली

RCB WIN IPL 2025 : रजत पाटीदारच्या नेतृत्त्वात रॉयल चॅलेंजर्स बंगळुरूने आयपीएल २०२५ ची ट्रॉफी जिंकली आहे. दुसऱ्या इनिंगच्या शेवटी सामना बंगळुरूच्या बाजूने फिरला. त्यानंतर शेवटच्या ओव्हर्समध्ये रॉयल चॅलेंजर्स बंगळुरूचा विजय निश्चित झाला. शेवटचे काही चेंडू बाकी असताना विराट कोहली भर मैदानात रडू लागला. १८ वर्षांच्या प्रतिक्षेनंतर बंगळुरूचा फायनलमधील विजय निश्चित झाल्याने विराटला अश्रू अनावर झाले. सामना संपल्यानंतर तो एबी डिव्हिलियर्सला मिठी मारुन रडू लागला.

आजचा अंतिम सामना पाहण्यासाठी एबी डिव्हिलियर्स, ख्रिस गेल यांसारखे आरसीबीचे अनेक माजी खेळाडू नरेंद्र मोदी स्टेडियमवर हजर होते. सामना जिंकल्यानंतर एबी डिव्हिलियर्सने विराट कोहलीला घट्ट मिठी मारली. दोघेही रडू लागले. एबीनंतर गेल देखील विराटला मिठ्ठी मारण्यासाठी पुढे आला. आरसीबीच्या खेळाडूंमध्ये विजयाचा आनंद पाहायला मिळाला.

२००८ पासून रॉयल चॅलेंजर्स बंगळुरूचा संघ हा आयपीएलमध्ये सहभागी होत आला आहे. तीनदा फायनलमध्ये प्रवेश करुनही बंगळुरूला यश मिळत नव्हते. आता २०२५ मध्ये बंगळुरूने ट्रॉफी जिंकली आहे. ट्रॉफी जिंकल्यानंतर स्टेडियमवर विराट कोहली आणि आरसीबीच्या चाहत्यांचा उत्साह पाहायला मिळाला.

१९१ धावांचे लक्ष्य गाठताना पंजाब किंग्सचा संघ मैदानात उतरला. त्यांची सुरुवात चांगली झाली. पण एका लागोपाठ विकेट्स पडल्याने पंजाबची गाडी मध्ये अडकली. पंजाबच्या शिलेदारांनी लढत दिली. पण बंगळुरूचे गोलंदाज वरचढ ठरले. शेवटच्या ओव्हर्समध्ये शशांक सिंहने सामना पंजाबला जिंकवून देण्याचा प्रयत्न केला. पण त्यांच्या प्रयत्नांना यश आले नाही.