Asia Cup 2025 schedule : भारत-पाकिस्तान भिडणार, तारीख ठरली! आशिया चषक स्पर्धेचं संपूर्ण वेळापत्रक

आशिया चषक स्पर्धेचं यजमानपद भारताकडं असलं तरी ही स्पर्धा आता यूएईमध्ये होणार आहे. ९ सप्टेंबरला स्पर्धेला सुरुवात होईल. २८ सप्टेंबरपर्यंत ही स्पर्धा असेल. पारंपरिक प्रतिस्पर्धी असलेले भारत-पाकिस्तान यांच्यात १४ सप्टेंबरला सामना होणार आहे. या दोन्ही संघांना एकाच गटात ठेवण्यात आले आहे.

यंदाची आशिया चषक स्पर्धा टी २० फॉरमॅटमध्ये खेळवली जाणार आहे. आयसीसी टी २० वर्ल्डकप २०२६ ही स्पर्धा डोळ्यांसमोर ठेवून तशी तयारी करण्यात आली आहे. भारत आणि श्रीलंका या दोन देशांकडं या वर्ल्डकप स्पर्धेचं संयुक्त यजमानपद असणार आहे.

एकाच गटात भारत-पाकिस्तान

या आशिया चषक स्पर्धेसाठी दोन गट असणार आहेत. एका गटात प्रत्येकी चार संघ असतील. भारत आणि पाकिस्तान या दोन संघांना एकाच गटात ठेवण्यात आलं आहे. 'ग्रुप ए'मध्ये भारत, पाकिस्तान, यूएई आणि ओमान हे संघ असतील. तर ग्रूप बीमध्ये श्रीलंका, बांगलादेश, अफगाणिस्तान आणि हाँगकाँग हे चार संघ असणार आहेत.

९ सप्टेंबरपासून स्पर्धेचा थरार

या स्पर्धेची सुरुवात ९ सप्टेंबरपासून होणार आहे. पहिला सामना अफगाणिस्तान आणि हाँगकाँग या दोन संघांमध्ये होईल. भारताचा पहिला सामना १० सप्टेंबरला यूएईविरुद्ध होणार आहे. तर दुसरा सामना पाकिस्तानविरुद्ध १४ सप्टेंबरला होईल. भारताची तिसरी लढत १९ सप्टेंबरला ओमानविरुद्ध होईल.

स्पर्धेमध्ये ८ संघांचा सहभाग

आशिया चषक स्पर्धा २०२५ च्या यंदाच्या पर्वात आठ क्रिकेट संघ सहभागी होणार आहेत. त्यात भारत, पाकिस्तान, श्रीलंका, बांगलादेश, अफगाणिस्तान, हाँगकाँग, ओमान आणि संयुक्त अरब अमिरात (यूएई) यांचा समावेश आहे. दोन गटांत हे संघ विभाजित करण्यात आले आहेत. एका गटात प्रत्येकी चार संघ असणार आहेत. विशेष म्हणजे भारत आणि पाकिस्तान या दोन संघांना एकाच गटात ठेवण्यात आले आहे. त्यामुळे त्यांच्यात लढत होणार हे निश्चित झालेलं आहे.