Accident : भाविकांच्या बसचा भीषण अपघात, ६ जणांचा जागीच मृत्यू, १५ जखमी

Punjab Fatehgarh Sahib Bus Accident death Toll : पंजाबच्या फतेहगड साहिब जिल्ह्यात एका भीषण अपघातात ६ भाविकांचा मृत्यू झालाय, तर १५ जण जखमी झाले आहेत. बस्सीपठाणा शहराजवळ ३५ भाविकांना घेऊन जाणाऱ्या बसचा अपघात झाला. या अपघातात आतापर्यंत सहा जणांचा मृत्यू झाल्याची माहिती मिळाली आहे. तर १५ हून अधिक प्रवासी जखमी झाले आहेत. काही जखमींची प्रकृती अतिशय गंभीर असल्याचे समजतेय. सर्व जखमींना तातडीने जवळच्या रुग्णालयांमध्ये दाखल करण्यात आले असून, त्यांच्यावर उपचार सुरू आहेत.

स्थानिक मीडियाने दिलेल्या माहितीनुसार, आनंदपूर साहिबला भेट देऊन भाविक घराकडे परत येत होते. बसमध्ये ३० ते ३५ यात्रेकरू होते. बस्सीपठाणा परिसराजवळ चालकाचे बसवरील नियंत्रण अचानक सुटले आणि ती उलटली. या अपघातामुळे घटनास्थळी एकच गोंधळ उडाला. आरडाओरड आणि वेदनेने विव्हळण्याचे आवाज येऊ लागले. स्थानिकांनी तात्काळ घटनास्थळी धाव घेत मदतकार्य सुरू केले. त्यांनी जखमींना बसमधून बाहेर काढले आणि पोलीस व रुग्णवाहिकेला माहिती दिली.

अपघाताची माहिती मिळताच पोलीस आणि बचावपथक घटनास्थळी दाखल झाल. तात्काळ जखमींना रूग्णालयात दाखल करण्यात आले. पोलिसांनी घटनास्थळाचा पंचनामा केला असून मृतदेह पोस्टमार्टमसाठी रूग्णालयात पाठवले आहेत. त्याशिवाय मृत्यू झालेल्यांची ओळख पटवण्याचे काम सुरू आहे. अपघातानंतर परिसरात एकच गोंधळ अन् महामार्गावर वाहतूककोंडी झाली होती. पोलिसांनी तात्काळ अपघातग्रस्त वाहन बाजूला सारून वाहतूक सुरळीत केली.

प्रत्यक्षदर्शींनी सांगितले की, बस भरधाव वेगात होती आणि अचानक चालकाचे नियंत्रण सुटल्याने अपघात झाला. दरम्यान, या अपघाताचे नेमके कारण अद्याप पोलिसांकडून सांगण्यात आलेले नाही. पंजाब पोलिसांनी गुन्हा दाखल करून तपास सुरू केला आहे. हा अपघात चालकाच्या निष्काळजीपणामुळे झाला की तांत्रिक बिघाडामुळे? हे याचा तपास केला जात आहे. मृत प्रवाशांची ओळख पटवण्याचे काम सध्या पोलिसांकडून करण्यात येत आहे. तर दुसरीकडे जखमींवर रूग्णालयात उपचार केले जात आहेत.