जुना मित्र पुन्हा भाजपसोबत येणार? पक्षाच्या प्रमुखांनी घेतली मोदींची भेट, राजकारणात खळबळ

Sukhbir Singh Badal PM Modi Meeting, Punjab Politics : पंतप्रधान नरेंद्र मोदी आणि शिरोमणी अकाली दलाचे अध्यक्ष सुखबीर सिंग बादल यांच्यात झालेल्या एका महत्त्वपूर्ण भेटीमुळे राजकारणात मोठ्या घडामोडींना उधाण आले आहे. या भेटीनंतर भाजप (BJP) आणि शिरोमणी अकाली दल (SAD) पुन्हा एकदा एकत्र येणार का, या जुन्या युतीबाबतच्या चर्चा राजकीय वर्तुळात प्रचंड तापल्या आहेत.

दोन्ही नेत्यांमधील ही भेट अनेक कारणांमुळे अत्यंत महत्त्वाची मानली जात आहे. आगामी राजकीय समीकरणे, पंजाबमधील राजकीय परिस्थिती आणि दोन्ही पक्षांची गरज लक्षात घेता, ही भेट केवळ औपचारिक नसून पुन्हा युतीचे संकेत देणारी असल्याचा दावा राजकीय विश्लेषकांकडून केला जात आहे.

पंतप्रधान नरेंद्र मोदी आणि शिरोमणी अकाली दलचे प्रमुख सुखबीर सिंग बादल यांच्या भेटीनंतर पंजाबच्या राजकारणात संभाव्य युतीबाबत चर्चा तीव्र झाली आहे. भाजपचे प्रदेशाध्यक्ष केवल सिंग ढिल्लन आणि राज्य संघटन महासचिव मंत्री श्रीनिवासुलू यांना दिल्लीत बोलावण्यात आले आहे. हे दोन्ही नेते भाजपचे राष्ट्रीय अध्यक्ष नितीन नवीन यांची भेट घेण्याची शक्यता आहे. पंतप्रधान मोदी आणि सुखबीर बादल यांच्या भेटीमुळे पंजाबमध्ये दोन्ही पक्षांमध्ये पुन्हा सलोखा होण्याची शक्यता निर्माण झाली आहे. शिरोमणी अकाली दलाच्या सूत्रांनुसार, सुखबीर यांची पंतप्रधानांसोबतची भेट पूर्वनियोजित होती आणि त्यात पंजाबमधील राजकीय परिस्थितीशी संबंधित मुद्द्यांवर चर्चा झाली.

सुखबीर बादल यांनी शुक्रवारी पंतप्रधान मोदींची भेट घेतली

२०२७ मध्ये होणाऱ्या पंजाब विधानसभा निवडणुकीच्या पार्श्वभूमीवर शिरोमणी अकाली दल (SAD) आणि भाजप (BJP) यांच्यातील संभाव्य राजकीय युती म्हणून या बैठकीकडे पाहिले जात आहे. सुखबीर बादल यांनी शुक्रवारी पंतप्रधान मोदी यांची भेट घेतली. २०२० मध्ये कृषी कायद्यांवरून शिरोमणी अकाली दल-भाजप युती तुटल्यानंतर दोन्ही नेत्यांमधील ही पहिली प्रत्यक्ष भेट असल्याचे म्हटले जात आहे. यापूर्वी १९९७ मध्ये सुरू झालेली या दोन पक्षांची जवळपास २३ वर्षांची युती होती.

सुखबीर बादल यांच्या पत्नी आणि लोकसभा सदस्य हरसिमरत कौर बादल यादेखील नरेंद्र मोदी सरकारमध्ये माजी मंत्री होत्या. कृषी कायद्यांवरून झालेल्या मतभेदांमुळे त्यांनी मंत्रिमंडळातून राजीनामा दिला होता. पंजाबमध्ये शिरोमणी अकाली दल आणि भाजपने तीन वेळा युती सरकार स्थापन केले आहे. दोन्ही पक्षांनी १९९७, २००७ आणि २०१२ मध्ये एकत्र निवडणुका लढवून सरकार स्थापन केले. गेल्या सहा वर्षांत दोन्ही पक्षांच्या सर्वोच्च नेत्यांमध्ये कोणतीही सार्वजनिक राजकीय बैठक झाली नव्हती.

सूत्रांनुसार, दिल्लीत केवल सिंग ढिल्लन आणि मंत्री श्रीनिवासुलू यांच्या भेटीदरम्यान पंजाब भाजपच्या आगामी रणनीतीवर चर्चा होण्याची शक्यता आहे. भाजप २०२७ च्या विधानसभा निवडणुकांच्या तयारीत व्यस्त आहे. पंजाबमधील सर्व ११७ विधानसभा जागा लढवण्याची तयारी करत असल्याचे संकेत पक्षाने सातत्याने दिले आहेत.