प्रसिद्ध गायिकेची निर्घृण हत्या; जंगलात आढळला जळालेला मृतदेह, चाहत्यांमध्ये खळबळ

उत्तर प्रदेशच्या झांसीमध्ये धक्कादायक घटना घडली आहे. उल्दन पोलीस स्टेशनच्या हद्दीत जंगलातील नदीकाठी एका महिलेचा अर्धवट जळलेल्या अवस्थेत मृतदेह आढळला. या घटनेने परिसरात खळबळ उडाली आहे. जंगलात आढळलेला मृतदेह लोक गायिका लाडकुंवर उर्फ लवली मौर्या यांचा असल्याचे पोलिसांच्या तपासात समोर आलं.

प्राथमिक तपासानुसार, लोक गायिकेची हत्या केल्यानंतर पुरावे नष्ट करण्यासाठी मृतदेह जाळल्याचा सांगण्यात येत आहे. घटनास्थळी दारूच्या बाटल्या देखील आढळल्या आहेत. तसेच बीयरचे कॅन, जळालेला मोबाइल, संशयित कार आढळली. एक शेतकरी शेतीसाठी निघाला. त्यावेळी जंगलात धूर निघत असल्याचे दिसून आलं. त्याने जवळ जाऊन पाहिल्यानंतर एका महिलेचा अर्धवट जळलेल्या अवस्थेत मृतदेह दिसला. मृतदेहाचे हात-पाय जळलेल्या अवस्थेत होते. शरीराचा बहुतेक भाग जळलेल्या अवस्थेत होता.

घटनेची माहिती मिळताच गावात खळबळ उडाली. गावातील डॉ. जगदीश कुशवाह यांनी पोलिसांना ही माहिती दिली. घटनेची माहिती मिळाल्यानंतर काही तासांत फॉरेन्सिक टीम आणि पोलीस कर्मचारी घटनास्थळी पोहोचले. घटनास्थळी पोहोचून पोलीस अधिकाऱ्यांनी प्राथमिक तपासात महिलेची हत्या झाल्याचा संशय व्यक्त केला आहे.

घटनास्थळी पोलिसांना अनेक संशयित वस्तू आढळल्या. जंगलाजवळी शेतातही दारूच्या रिकाम्या बॉटल देखील दिसून आल्या. शेतात लाल रंगाची साडीचा तुकडा देखील सापडला. महिलेची काळ्या रंगाची चप्पल देखील जप्त करण्यात आली आहे. पोलिसांच्या म्हणण्यांनुसार, महिलेला एका वाहनाने आणलं गेलं. तिची हत्या केल्यानंतर मृतदेह जाळण्यात आला असावा.

महिलेची ओळख आणि पुरावा नष्ट करण्याचाही प्रयत्न झाला. सुरुवातीला मृतदेहाची ओळख पटवण्यात अडचणी येत होत्या. अर्धवट जळालेल्या मृतदेहाचे फोटो व्हायरल झाले. त्यानंतर घटनास्थळी आढळलेल्या पुराव्याच्या आधारे मृतदेहाची ओळख पटली. जंगलात सापडेला मृतदेह ४५ वर्षीय लाडकुंवर उर्फ लवली मौर्या यांचा असल्याचे निश्चित झालं.