Latur : माजी सैनिकाच्या बंद घरातून कुजलेला वास, पोलिसांनी दार उघडताच समोर दिसलं भयंकर चित्र, लातूरमध्ये खळबळ

संदीप भोसले, लातूर

लातूरच्या उदगीर शहरातील जळकोट रोडवरील जय मल्हार धाब्याच्या पाठीमागे असलेल्या वसाहतीत एक धक्कादायक घटना उघडकीस आली आहे. एका माजी सैनिकाचा मृतदेह त्याच्याच राहत्या घरात सडलेल्या अवस्थेत आढळून आल्याने परिसरात खळबळ उडाली आहे. ही घटना गुरुवारी सकाळी सुमारे आठच्या सुमारास समोर आली. याप्रकरणी पोलीस पुढील तपास करत आहेत.

मिळालेल्या माहितीनुसार, प्रकाश बाबुराव सासट्टे (वय ३९, रा. उदगीर) असे मृत माजी सैनिकाचे नाव असून ते मूळचे जळकोट तालुक्यातील अतनूर येथील रहिवासी होते. मागील काही वर्षांपासून ते उदगीर येथे आपल्या आई-वडिलांसोबत राहत होते. सासट्टे यांच्या घरातून काही दिवसांपासून तीव्र दुर्गंधी येत होती. सुरुवातीला शेजाऱ्यांनी याकडे दुर्लक्ष केले, मात्र दुर्गंधी वाढत गेल्याने त्यांनी संशय व्यक्त करत तात्काळ पोलिसांना याची माहिती दिली.

माहिती मिळताच उदगीर ग्रामीण पोलिसांनी घटनास्थळी धाव घेतली. पोलिसांनी घराचे दार उघडून आत प्रवेश केला असता, सासट्टे यांचा मृतदेह सडलेल्या अवस्थेत आढळून आला. प्राथमिक तपासानुसार, त्यांचा मृत्यू सुमारे चार दिवसांपूर्वी झाला असावा, असा अंदाज पोलिसांनी व्यक्त केला आहे. मात्र, मृत्यूचे नेमके कारण अद्याप स्पष्ट झालेले नाही. याबाबत अधिक तपास सुरू असून शवविच्छेदन अहवालानंतरच मृत्यूमागील कारण स्पष्ट होणार आहे.

या प्रकरणी उदगीर ग्रामीण पोलीस ठाण्यात अकस्मात मृत्यूची नोंद करण्यात आली आहे. पोलिसांकडून सर्व बाजूंनी तपास केला जात असून, कोणताही संशयास्पद प्रकार आहे का? याचाही शोध घेतला जात आहे. दरम्यान, या घटनेमुळे परिसरातील नागरिकांमध्ये भीतीचे वातावरण निर्माण झाले असून, सासट्टे यांच्या कुटुंबीयांवर दुःखाचा डोंगर कोसळला आहे. शांत आणि साधे जीवन जगणाऱ्या सासट्टे यांच्या अचानक मृत्यूमुळे परिसरात हळहळ व्यक्त केली जात आहे. प्रशासनाने लवकरात लवकर या प्रकरणाचा उलगडा करावा, अशी मागणी केली आहे.