Nigeria School Fire : शाळेला लागलेल्या भीषण आगीत १७ विद्यार्थ्यांचा मृत्यू; घटनेने सर्वच हळहळले

नायजेरियाच्या शाळेत भीषण दुर्घटना घडली आहे. नायजेरियातील एका शाळेत लागलेल्या आगीत १७ विद्यार्थ्यांचा होरपळून मृत्यू झाल्याची घटना घडली आहे. या आगीच्या घटनेत काही विद्यार्थी जखमी झाल्याची माहिती मिळाली आहे. नायजेरियात घडलेल्या घटनेने परिसरात खळबळ उडाली. ही आग नेमकी कशी लागली, याचा तपास सुरु करण्यात आला आहे.

मीडिया रिपोर्टनुसार, नायजेरियाच्या शाळेत आग लागली, त्यावेळी शाळेत एकूण १०० विद्यार्थी होते. या घटनेत १७ विद्यार्थ्यांचा मृत्यू झाला आहे. तर इतर विद्यार्थी गंभीर जखमी झाले आहेत. त्यांच्यावर रुग्णालयात उपचार सुरु आहेत. शाळेल्या लागलेल्या आगीचं कारण अद्याप स्पष्ट झालेलं नाही. आग लागल्यानंतर आजूबाजूचे लोक घटनास्थळी पोहोचले.

नायजेरियाचे राष्ट्राध्यक्ष बोला टिनुबू यांनी पीडितांच्या कुटुंबाप्रति संवेदना व्यक्त केली आहे. त्यांनी शाळेतील जखमी विद्यार्थ्यांवर तातडीने उपचार करण्याचे आदेश दिले आहेत. तसेच त्यांनी नियमांचे पालन करण्याचे आदेश दिले आहेत. मागील महिन्यात देखील नायजेरियाची राजधानी अबुजा भागात एका शाळेला आग लागली होती. शाळेल्या लागलेल्या भीषण आगीत दोघांचा मृत्यू झाला होता.

नेमकं कशामुळे घडली घटना?

शाळेत नेमकी कशी आग लागली, हे अद्याप स्पष्ट झालेलं नसल्याचं एजन्सीने म्हटलं आहे. मिळालेल्या प्राथमिक निष्कर्षावरून दिसून आले की, शाळेजवळ काही काठ्या ठेवण्यात आल्या होत्या. या काठ्यांना स्थानिक भाषेत 'कारा' म्हटलं जातं. याच काठ्यांमुळे आग लागल्याचं बोललं जात आहे. दरम्यान, नायजेरियाचे राष्ट्राध्यक्ष बोला टिनुबू यांनी पीडित कुटुंबाप्रति संवेदना व्यक्त केली आहे. शाळेतील विद्यार्थ्यांना सुरक्षा देण्याचे आवाहनही त्यांनी केलं.

बुर्किना फासो-नायजर सीमेजवळील हल्ल्यात १० जणांचा मृत्यू

दरम्यान, नायजर आणि बुर्किना फासो सीमेजवळ झालेल्या हल्ल्यात नायजरच्या दहा सैनिकांचा मृत्यू झाल्याची घटना घडली. नायजरच्या सैन्य दलाने गुरुवारी ही माहिती दिली. नायजरच्या सैन्याने म्हटलं की, 'एका युनिटला ताखजात गावातील मवेशियांमध्ये चोरट्यांना पकडण्यासाठी पाठवण्यात आलं होतं. याच चोरट्यांनी केल्या हल्ल्यात १० सैनिकांचा मृत्यू झाला आहे.