Gunfire Shooting : क्लबमध्ये अंदाधुंद गोळीबार! तिघांचा जागीच मृत्यू, आठजण जखमी

USA New York Shooting : अमेरिकेतील न्यूयॉर्क शहरात एक धक्कादायक घटना घडली आहे. न्यूयॉर्कमधील एका क्लबमध्ये गोळीबार झाला. या घटनेमध्ये तिघांचा मृत्यू झाला असून आठजण गंभीररित्या जखमी झाल्याची माहिती समोर आली आहे. जखमींना जवळच्या रुग्णालयात दाखल करण्यात आल्याचे न्यूयॉर्क पोलीस विभागाने सांगितले आहे.

मिळालेल्या माहितीनुसार, न्यूयॉर्क शहरातील क्लबमध्ये काही हल्लेखोरांनी गोळीबार केला. स्थानिक वेळेनुसार पहाटे तीन - साडेतीनच्या सुमारास क्लबमध्ये गोळीबार झाला. ही घटना न्यूयॉर्कमधील ब्रुकलिनच्या क्राउन हाइट्स येथील टेस्ट ऑफ द सिटी लाउंजमध्ये घडली आहे. या क्लबमध्ये अनेक शस्त्रांनी गोळीबार करण्यात आला.

न्यूयॉर्क पोलीस विभागाच्या आयुक्त जेसिका टिश यांनी दिलेल्या माहितीनुसार, ब्रुकलिनच्या टेस्ट ऑफ द सिटी लाउंजमध्ये गोळीबार झाला. या गोळीबारात तीन जणांचा मृत्यू झाला. यात आठ जण जखमी झाले असून जखमींमध्ये तीन महिलांचा समावेश आहे. या प्रकरणाची चौकशी सुरु आहे. गोळीबाराचे कारण अद्याप अस्पष्ट आहे.

जेसिका टिश यांनी या घटनेनंतर पत्रकार परिषदेमध्ये माध्यमांशी संवाद साधला. न्यूयॉर्क शहरातील ही एक भयानक गोळीबाराची घटना आहे. पोलिसांनी टेस्ट ऑफ दि सिटी लाउंज येथून ३५ गोळ्या आढळल्या आहेत. याशिवाय जवळच्या रस्त्यावरुन आम्ही एक बंदूक जप्त केली आहे. यात तिघांचा मृत्यू झाला आहे. जखमींवर उपचार सुरु असून त्यांच्या प्रकृतीत सुधारणा आहे. जखमींचे वय २७ ते ६१ वर्षांच्या दरम्यान आहे.