Shirdi : दहीहंडीच्या मिरवणुकीत हत्येचा थरार, जुन्या वादातून मित्रांकडून १८ वर्षीय तरुणाची हत्या

सचिन बनसोडे, साम टीव्ही, प्रतिनिधी

शिर्डीत जुन्या वादातून एका तरुणाची हत्या झाल्याने एकच खळबळ उडाली आहे. काल (१६ ऑगस्ट) रात्री शहरातील दहीहंडी मिरवणुकीनंतर दोन तरुणांनी त्यांच्याच ओळखीतल्या मित्राची हत्या केल्याची घटना घडली आहे. सानूकुमार ठाकूर (वय १८ वर्ष) असे मयत तरुणाचे नाव असून या हत्येप्रकरणी शिर्डी पोलिसांनी साई कुमावत आणि शुभम गायकवाड या दोन्ही आरोपींना तातडीने बेड्या ठोकल्या आहेत.

सानुकूमार ठाकुर आणि आरोपी साई कुमावत, शुभम गायकवाड हे तिघेही मित्र होते. काल दहीहंडी उत्सवाची मजा घेत असताना सानूकुमार याने फोन करून दोघांनाही एका हॉटेलसमोर बोलावले. तिथे मयत आणि आरोपींमध्ये अगोदर शिवीगाळ आणि नंतर शाब्दीक बाचाबाची झाली. आरोपी साई आणि शुभमने सानुकूमार याला लाथाबुक्यांनी मारहाण करत चाकूने सपासप वार केले. त्यानंतर आरोपी घटनास्थळावरून पसार झाले. रात्री बारा वाजेच्या सुमारास हि घटना घडली.

गंभीर जखमी झालेल्या सोनुकूमारला उपचारासाठी जवळच्या साईबाबा रुग्णालयात नेण्यात आले. मात्र तेथे उपचार करण्याआधीच डॉक्टरांनी त्याला मृत घोषित केले. पोलिसांनी तात्काळ दोन्ही आरोपींना ताब्यात घेतले. अपर पोलिस अधीक्षक सोमनाथ वाकचौरे यांनी घटनेचे गांभीर्य ओळखून आज (१७ ऑगस्ट) घटनास्थळी भेट देत पाहणी केली आहे.

मयताचे वडील नवीनकुमार बालबोध ठाकूर यांच्या तक्रारीवरून भारतीय न्याय संहिता कलमान्वये गुन्हा दाखल करण्यात आला आहे. या प्रकरणाचा अधिकचा तपास शिर्डी पोलीस करत आहेत.. काही महिन्यांपूर्वी शिर्डी दुहेरी हत्याकांडाने हादरली होती. त्यानंतर शिर्डी पोलिसांनी परिसरातील गुन्हेगारी मोडीत काढण्यासाठी कारवायांचा धडका लावला होता. मात्र काल रात्री झालेल्या तरुणाच्या हत्येने शिर्डीत खळबळ उडाली आहे.