Bullet Train: 'मेड इन इंडिया' बुलेट ट्रेन लवकरच धावणार, तिकिटाबाबत महत्त्वाची अपडेट आली समोर, वाचा सविस्तर

Summary:

• मुंबई- अहमदाबाद बुलेट ट्रेन २०२७ मध्ये सुरू होणार

• सुरत ते वापी बुलेट ट्रेन पहिला टप्पा लवकरच सुरू होणार

• मेड इन इंडिया B28 बुलेट ट्रेन प्रकल्प

• या ट्रेनेचे तिकीट कधीपासून मिळणार याबाबत महत्वाची माहिती समोर

भारतातील महत्वाकांक्षी हाय-स्पीड रेल प्रकल्पाने एक महत्वाचा टप्पा गाठला आहे. अहमदाबाद-मुंबई बुलेट ट्रेन प्रकल्पाच्या पहिल्या टप्प्यात भारतीय बनावटीची बुलेट ट्रेन B28 चालवली जाणार आहे. B28 म्हणून ओळखला जाणारा हा ट्रेनसेट सध्या बीईएमएलद्वारे तयार केला जात आहे. ऑगस्ट २०२७ मध्ये त्याचे काम पूर्ण होण्याची शक्यता आहे. त्यानंतर बुलेट ट्रेनसाठी तिकीट बुकिंगला सुरूवात होईल. रेल्वे मंत्रालयाने बुलेट ट्रेनबाबत संसदीय स्थायी समितीला सादर केलेल्या अहवालात ही माहिती दिली.

मुंबई-अहमदाबाद बुलेट ट्रेन ऑगस्ट २०२७ मध्ये सुरू होणार आहे. रेल्वे मंत्रालयाने संसदीय समितीला माहिती दिली की, राष्ट्रीय वाहतूक कंपनीने ९७ किमी सुरत ते वापी या मार्गावर BEML-निर्मित ट्रेनसेट्स वापरून काम सुरू करण्याचा निर्णय घेतला आहे. मंत्रालयाच्या म्हणण्यानुसार, बुलेट ट्रेनचे प्रारंभिक ऑपरेशन कॉरिडॉरच्या ९७ किमी सुरत-वापी सेक्शनवर सुरू होईल. हा स्ट्रेच मुंबई-अहमदाबाद हाय-स्पीड रेल प्रकल्पाचा पहिला ऑपरेशनल सेगमेंट म्हणून काम करेल.

सरकारने सांगितले की, B28 भारत-निर्मित बुलेट ट्रेन लवकरच सुरू करण्याबाबतचा निर्णय घेण्यात आला आहे. ही ट्रेन ताशी २८० किमी वेगाने धावण्यास सक्षम आहे. तर इतर ट्रेनसेट्सवर काम सुरू आहे. बुलेट ट्रेन प्रकल्प हा एक अत्यंत गुंतागुंतीचा आणि तंत्रज्ञान-केंद्रित प्रकल्प आहे. यात जपान आणि इतर देशांकडून तंत्रज्ञान हस्तांतरण आणि खरेदी-पुरवठा यांचा समावेश आहे. हा कॉरिडॉर जपानच्या शिंकानसेन हाय-स्पीड रेल तंत्रज्ञानावर आधारित आहे.

अहमदाबाद-मुंबई बुलेट ट्रेनच्या प्रकल्पाचा खर्च वाढत चालला आहे. मंत्रालयाने संसदीय समितीला माहिती दिली की सुरुवातीच्या व्यवहार्यता अहवालाच्या आधारे डिसेंबर २०१५ मध्ये प्रकल्पाचा मूळ अंदाजित खर्च ९७,६३६ कोटी रुपये होता. सुरुवातीच्या अंदाजात समाविष्ट नसलेल्या अनेक घटकांमुळे खर्चात खूप मोठी वाढ झाली. कर आणि उपकर २९,३३० कोटी रुपये, उपयुक्तता स्थलांतर २,६२५ कोटी रुपये, स्टेशन अ‍ॅप्रोच डेव्हलपमेंटसाठी २,१९५ कोटी रुपये, वीजपुरवठा व्यवस्थापनेसाठी १,२५० कोटी रुपये, स्वदेशी गाड्या आणि ईटीसीएस सिग्नलिंग सिस्टमसाठी १६,५०० कोटी रुपये, तिकीट व्यवस्थासाठी २८३ कोटी रुपये, वन मंजुरी शुल्कसाठी ४०० कोटी रुपये त्याचसोबत २०१५ पासून महागाई आणि वाढत्या उत्पादन खर्चामुळे प्रकल्प खर्चात १९,०८४ कोटी रुपयांची भर पडली आहे.

मुंबई-अहमदाबाद हाय-स्पीड रेल प्रकल्प हा भारतातील पहिला बुलेट ट्रेन कॉरिडॉर आहे. हा कॉरिडॉर मुंबई आणि अहमदाबाद दरम्यानचा प्रवास वेळ कमी करेल. या प्रकल्पामुळे भारतात जागतिक दर्जाचे हाय-स्पीड रेल तंत्रज्ञान देखील आणेल. स्वदेशी B28 बुलेट ट्रेन आता पहिल्या ऑपरेशनल स्ट्रेचसाठी नियोजित असल्याने हा प्रोजेक्ट हाय-स्पीड रेल उत्पादनात देशांतर्गत क्षमता निर्माण करण्याच्या दिशेने एक महत्त्वाचे पाऊल असणार आहे.