वंदे भारतचे तिकिट खूपच स्वस्त, रेल्वेमंत्र्यांनी मांडलं गणित; चीन, जपान अन् फ्रान्सचा दाखला देत म्हणाले...

Vande Bharat latest News : वंदे भारत एक्सप्रेसच्या तिकिटाचे दर हे इतर देशांच्या तुलनेत स्वस्तच असल्याचं रेल्वेमंत्री अश्विनी वैष्णव यांनी म्हटलेय. लोकसभेत दिलेल्या लेखी निवेदनात रेल्वेमंत्र्यांनी वंदे भारत एक्सप्रेसच्या एसी चेअर कारचे तिकिट हे चन, जपान आणि फ्रान्स या देशातील ट्रेन्सपेक्षा स्वस्त असल्याचं म्हटलेय. त्यांच्या या दाव्यानंतर सोशल मीडियावर वंदे भारतच्या तिकिटाच्या किंमतीची जोरदार चर्चा सुरू आहे.

वंदे भारत एसी चेअर कारचे भाडे ३००-४०० किलोमीटरसाठी २.१९ रुपये प्रति किलोमीटर इतके आहे. हे तिकिटाचे दर चीन, जपान आणि फ्रान्स या देशात समान सेवांच्या भाड्यामध्ये खूपच कमी आहे. करण या देशामधील समान सेवेसाठी प्रति किलोमीटर ७ ते २० रूयये इतके भाडे आकारले जाते, असे रेल्वे मंत्री म्हणाले. दरम्यान, रेल्वेमंत्र्यांनी तिकिटाची किंमत ठरवताना काय विचार केला जातो, याबाबतही माहिती दिली. ते म्हणाले की, रेल्वे मंत्रालय विविध प्रकारच्या प्रवासी सेवांच्या भाडे ठरवतात. सेवेचा खर्च, सेवेचे मूल्य, देऊ केलेल्या सेवा आणि सुविधांचा प्रकार, परवडणारी क्षमता, इतर स्पर्धात्मक पद्धतींमधील स्पर्धा आणि सामाजिक-आर्थिक बाबींचा योग्य विचार केला जातो.

फेब्रुवारी २०१९ मध्ये पहिली वंदे भारत एक्सप्रेस धावली. तेव्हापासून आतापर्यंत देशात ८२ मार्गावर १६४ वंदे भारत एक्सप्रेसच्या सेवा सुरू आहेत, असे रेल्वे मंत्री म्हणाले. वंदे भारत एकसप्रेसमध्ये सुधारित सस्पेंशन सिस्टम, सेमी-हाय-स्पीड ऑपरेशन्ससह जलद प्रवेग, स्वयंचलित प्लग दरवाजे, एर्गोनॉमिक सीट्स, मिनी पेंट्री, सीसीटीव्ही आणि कवच यासारख्या सुविधा आहेत. परवडणारी क्षमता लक्षात घेऊन, या गाड्यांची भाडे रचना सेवेच्या किमतीपेक्षा कमी ठेवण्यात आली आहे, असेही ते म्हणाले.

भारतीय रेल्वे दरवर्षी ७.२ अब्जाहून अधिक प्रवाशांना परवडणाऱ्या दरात वाहतूक सेवा पुरवते. भारतीय रेल्वेची भाडे रचना सामाजिक-आर्थिक घटकांना विचारात घेते. जगभरातील विविध रेल्वे प्रणालींनी स्वीकारलेल्या संबंधित सर्वोत्तम पद्धतीसारखी आहे. जगातील इतर देशांच्या तुलनेत भारतीय रेल्वेचे भाडे सर्वात कमी आहे. वंदे भारत गाड्यांमध्ये भाड्यात कोणतीही सवलत नाही. पण प्रत्येक रेल्वे सेवेच्या चेअर कारमध्ये चार जागा दिव्यांगांसाठी राखीव ठेवण्यात आल्या आहेत,असेही ते म्हणाले.