Mumbai-Ahmedabad Bullet Train : मुंबई–अहमदाबाद बुलेट ट्रेन प्रकल्पाला गती; पालघरमधील ४५४ मीटर लांबीच्या टनेलचे काम पूर्ण

मोदी सरकारच्या महत्वाकांक्षी मुंबई–अहमदाबाद बुलेट ट्रेन प्रकल्पाला पालघर जिल्ह्यात मोठं यश मिळालं आहे. पालघरमधील बुलेट ट्रेनसाठी उभारण्यात येणाऱ्या महत्त्वाच्या टनेलचं काम तब्बल बारा महिन्यांनंतर आज यशस्वीरित्या पूर्ण करण्यात आलं आहे. अत्याधुनिक न्यू ऑस्ट्रेलियन टनेलिंग पद्धतीने (NATM) या बोगद्याचं खोदकाम करण्यात आलं असून, हा टनेल सुमारे ४५४ मीटर लांब आणि १४.४ मीटर रुंद आहे. मुंबई–अहमदाबाद बुलेट ट्रेन प्रकल्पासाठी अप आणि डाऊन ट्रॅकसाठी हा टनेल तयार करण्यात आला आहे.

कठीण डोंगराळ भागातून जाणाऱ्या या मार्गासाठी अत्यंत आधुनिक ड्रिलिंग तंत्रज्ञान आणि नियंत्रित स्फोटांचा वापर करून हे काम पूर्ण करण्यात आलं. अवघ्या बारा महिन्यांत हे खोदकाम पूर्ण होणं ही या प्रकल्पासाठी मोठी उपलब्धी मानली जात आहे. न्यू ऑस्ट्रेलियन टनेलिंग पद्धतीमध्ये भूप्रदेशाची रचना लक्षात घेऊन टप्प्याटप्प्याने खोदकाम केलं जातं. त्यामुळे सुरक्षेला अधिक प्राधान्य दिलं जात असून, कामाची गुणवत्ता आणि टिकाऊपणाही वाढतो.

याच पद्धतीचा वापर करून पालघरमधील हा बोगदा उभारण्यात आला आहे. महत्त्वाचं म्हणजे, बुलेट ट्रेन प्रकल्पासाठी महाराष्ट्रातील पालघर जिल्ह्यात एकूण सात माउंट टनेल उभारण्यात येणार असून, त्यातील हा एक महत्त्वाचा टप्पा पूर्ण झाला आहे. उर्वरित टनेल्सचं कामही वेगाने सुरू असून, येत्या काळात या प्रकल्पाला आणखी गती मिळणार आहे. मुंबई ते अहमदाबाद दरम्यान धावणारी बुलेट ट्रेन ही देशातील पहिली हाय-स्पीड रेल सेवा ठरणार आहे.

या प्रकल्पामुळे प्रवासाचा वेळ मोठ्या प्रमाणात कमी होणार असून, महाराष्ट्र आणि गुजरातमधील आर्थिक, औद्योगिक आणि सामाजिक विकासाला मोठी चालना मिळेल, असा विश्वास व्यक्त केला जात आहे. पालघरमधील टनेलचं काम पूर्ण झाल्यामुळे बुलेट ट्रेन प्रकल्पाच्या दिशेने आणखी एक महत्त्वाचं पाऊल टाकण्यात आलं असून, हा प्रकल्प वेळेत पूर्ण होण्यासाठी ही बाब निर्णायक ठरणार आहे.