Accident News : धुक्याने घात केला! प्रवाशांनी भरलेल्या बसचं नियंत्रण सुटलं अन् बस थेट दरीत कोसळली; ९ जणांचा मृत्यू, २६ जखमी

तुर्की येथे ३४ प्रवाशांना घेऊन जाणारी बस उलटल्याने भीषण अपघात झाला आहे. या अपघातात ९ जणांचा जागीच मृत्यू झाला असून २६ जण गंभीर जखमी आहे. स्थानिक प्रशासनाने म्हटल्याप्रमाणे या अपघातातील मृतांचा आकडा वाढण्याची शक्यता आहे. दरम्यान हा अपघात काल रात्रीच्या सुमारास घडला असून या घटनेने परिसरात खळबळ उडाली आहे.

मिळालेल्या माहितीनुसार, तुर्की येथील दक्षिणेकडील अंतल्या या प्रांतात काही पर्यटक फिरण्यासाठी आले होते. दरम्यान रात्रीच्या सुमारास धुकं आणि ओलसर रस्त्यांमुळे चालकाचा बसवरील ताबा सुटला.

त्यामुळे प्रवाशांनी भरलेली बस बाजूला असलेल्या सरंक्षक भिंतीला तोडून थेट दरीत कोसळली. यावेळेस या बसमध्ये सुमारे ३४ प्रवासी प्रवास करत होते. हे सगळे प्रवासी पर्यटनासाठी फिरत होते. या भीषण अपघातात ९ जणांचा मृत्यू झाला असून २६ जण गंभीर जखमी झाले आहेत. या घटनेनंतर अपघाताची माहिती कळताच पोलीस तातडीने घटनास्थळी दाखल झाले.

जखमींना रुग्णालयात दाखल करण्यात आले असून त्यांच्यावर पुढील उपचार सुरु आहेत. यामध्ये बस चालकाला रुग्णालयात घेऊन जाताना त्याचा मृत्यू झाला. या अपघातातील मृतांचा आकडा वाढण्याची शक्यता स्थानिक प्रशासनाने वर्तवली आहे. दरम्यान याबाबात पोलीस पुढील तपास करत आहेत.