Lok Sabha 2024: भाजप सरकारी यंत्रणेवर दबाव आणून लोकशाही लुटतंय; राहुल गांधींचा गंभीर आरोप

प्रमोद जगताप, साम टीव्ही नवी दिल्ली

देशभरात चार टप्प्यातील मतदान पार पडलं आहे. आज पाचव्या टप्प्यातील मतदान होत आहे. या रणधुमाळीमध्ये कॉंग्रस नेते राहुल गांधी यांनी त्यांच्या X या सोशल मीडिया अकाउंटवरून एक व्हिडिओ शेअर केला आहे. या व्हिडिओमधील तरूण ८ वेळा मतदान केल्याचा दावा करत आहे. यावरून राहुल गांधींनी भाजपवर सडकून टीका केली आहे.

हा व्हिडिओ राहुल गांधी आणि अखिलेश यादव यांनी त्यांच्या अधिकृत सोशल मीडिया अकाउंटवर पोस्ट केला आहे. यावरून त्यांनी भाजपवर टीका केली आहे. भाजप सरकारी यंत्रणेवर दबाव आणत असल्याचा खळबळजनक आरोप त्यांनी केला (Lok Sabha 2024) आहे. देशातील लोकशाही लुटायची असल्याचं देखील राहुल गांधींनी त्यांच्या X पोस्टमध्ये म्हटलं आहे.

काँग्रेस नेते राहुल गांधी आणि समाजवादी पार्टीचे अध्यक्ष अखिलेश यादव ( Akhilesh Yadav) यांनी ईव्हीएमवर मतदान करणाऱ्या तरुणाचा व्हिडिओ शेअर केला आहे. हा व्हिडिओ उत्तर प्रदेशातील एटामधील असल्याचं सांगितलं जात आहे. यात एक तरुण ८ वेळा मतदान केल्याचा दावा करत आहे. यावरून आपला पराभव समोर पाहून भाजपला जनादेश नाकारण्यासाठी सरकारी यंत्रणेवर दबाव आणून लोकशाही लुटायची आहे, अशी टीका राहुल गांधी (Rahul Gandhi) यांनी केली आहे.

सोबतच, निवडणुकीचे कर्तव्य बजावणाऱ्या सर्व अधिकाऱ्यांनी सत्तेच्या दबावाला सामोरे जाताना आपली घटनात्मक जबाबदारी विसरू नये, अशी अपेक्षा देखील त्यांनी व्यक्त केली आहे. इंडिया आघाडीचं सरकार स्थापन होताच, अशी कारवाई केली जाईल की भविष्यात कोणीही 'संविधानाच्या शपथेचा' अवमान करण्यापूर्वी १० वेळा विचार करेल, असा इशाराही राहुल गांधींनी दिला आहे. हा व्हिडिओ (BJP) शेअर करत अनेक नेत्यांनी भाजपवर टीका केली आहे. जर निवडणूक आयोगाला हे चुकीचे वाटत असेल तर त्यांनी कारवाई करावी, अशी मागणी अखिलेश यादव यांनी केली आहे. भाजपची बूथ कमिटी ही लूट कमिटी असल्यातचं म्हणत त्यांनी टीका केली आहे.